Live Updates

عطا تارڑ نے کہا ہم دیکھتے ہیں سہیل آفریدی کیسے وزیر اعلٰی بنتا ہے

یہ دیکھیں جناب ایسے بنتا ہے سہیل آفریدی وزیر اعلٰی! اسد عمر کا وزیر اطلاعات کو جواب

محمد علی بدھ 15 اکتوبر 2025 19:46

عطا تارڑ نے کہا ہم دیکھتے ہیں سہیل آفریدی کیسے وزیر اعلٰی بنتا ہے

پشاور ( اُردو پوائنٹ اخبارتازہ ترین۔ 15 اکتوبر2025ء ) "یہ دیکھیں جناب ایسے بنتا ہے سہیل آفریدی وزیر اعلٰی!"۔ تفصیلات کے مطابق سابق وفاقی وزیر اسد عمر کی جانب سے وزیر اعلٰی خیبرپختونخواہ کے انتخاب سے متعلق وفاقی وزیر اطلاعات عطا تارڑ کے حالیہ بیان پر ردعمل دیا گیا ہے۔ اسد عمر نے کہا کہ عطا تارڑ نے کہا ہم دیکھتے ہیں سہیل آفریدی کیسے وزیر اعلٰی بنتا ہے۔

یہ دیکھیں جناب ایسے بنتا ہے سہیل آفریدی وزیر اعلٰی! ۔ واضح رہے کہ بدھ کے روز پاکستان تحریک انصاف کے رکن صوبائی اسمبلی سہیل آفریدی نے وزیراعلیٰ خیبرپختونخواہ کے عہدے کا حلف اٹھالیا، حلف برداری کی یہ تقریب گورنر ہاؤس پشاور میں منعقد ہوئی جہاں گورنر خیبرپختونخواہ فیصل کریم کنڈی نے نو منتخب وزیراعلیٰ سے عہدے کا حلف لیا، سہیل آفریدی کی جانب سے حلف اٹھائے جانے کے بعد اس وقت دلچسپ صورتحال پیدا ہوئی، جب تحریک انصاف کے کارکنوں کی طرف سے ’شرم کرو، حیا کرو‘ کے نعرے لگائے گئے، اس دوران کئی کارکن گورنر فیصل کریم کنڈی کا نام لے کر ہنستے دکھائی دیئے، تاہم حلف لینے کے بعد گورنر خیبر پختونخواہ نے سہیل آفریدی کو گلے لگایا اور انہیں مبارکباد بھی دی، جس کے بعد فیصل کریم کنڈی تقریب سے روانہ ہوگئے۔

(جاری ہے)

بتایا گیا ہے کہ گورنر ہاؤس پشاور میں سہیل آفریدی کی بطور وزیراعلیٰ حلف برداری کی تقریب میں پارٹی کے سینئر رہنما اور سابق وزراء بھی شریک ہوئے، اس موقع پر آئی جی پولیس اور چیف سیکرٹری بھی نو منتخب وزیر اعلیٰ کے ہمراہ گورنر ہاوس پہنچے جب کہ سہیل آفریدی کی وزیراعلیٰ ہائوس سے حلف برداری کے لئے روانگی سے قبل خصوصی دعا کی گئی ،سہیل آفریدی کو روانگی سے پہلے وزیراعلیٰ ہاؤس میں قبائلی مشران نے دعاؤں کے ساتھ انہیں رخصت کیا۔