Live Updates

وزیراعلیٰ خیبرپختونخواہ علی امین گنڈاپور نے اسلام آباد میں اپنا قیام طویل کرلیا

وزیراعلیٰ خیبرپختونخواہ پچھلے 4 دن سے وفاقی دارالحکومت اسلام آباد میں ہی قیام پذیر ہیں

ساجد علی اتوار 23 مارچ 2025 15:05

اسلام آباد ( اُردو پوائنٹ اخبارتازہ ترین۔ 23 مارچ 2025ء ) وزیراعلیٰ خیبرپختونخواہ علی امین گنڈاپور نے اسلام آباد میں اپنا قیام طویل کرلیا۔ میڈیا رپورٹس کے مطابق ذرائع کا کہنا ہے کہ وزیراعلیٰ خیبرپختونخواہ 4 دن سے وفاقی دارالحکومت اسلام آباد میں ہی قیام پذیر ہیں، وہ بانی چیئرمین پی ٹی آئی عمران خان سے ملاقات کرکے ہدایات لینا چاہتے ہیں، ملاقات میں متوقع طور پر علی امین گنڈا پور عمران خان کو اپنی کارکردگی سے متعلق بھی آگاہ کریں گے اور مختلف پالیسیز پر ان سے گائیڈ لائنز لیں گے، اس کے علاوہ وہ کچھ اہم فیصلوں پر بانی چیئرمین پی ٹی آئی سے مشاورت بھی کریں گے۔

(جاری ہے)

اس حوالے سے ترجمان وزیراعلیٰ خیبرپختونخواہ فراز مغل نے بتایا ہے کہ وزیراعلیٰ علی امین گنڈاپور پی ٹی آئی کے بانی چیئرمین عمران خان کی مشاورت سے اہم فیصلے کرتے ہیں، اسی لیے انہوں نے عمران خان سے ملاقات کے لیے عدالت سے بھی رجوع کیا ہے، وزیراعلیٰ کے پاس کسی بھی جیل کا دورہ کرنے کا اختیار ہوتا ہے، امید ہے جلد علی امین گنڈاپور کی بانی پی ٹی آئی سے ملاقات ہو جائے گی۔