عیدالفطر کیلئے تعلیمی اداروں میں تعطیلات کا اعلان

عید کی چھٹیوں کے حوالے سے باقاعدہ نوٹی فکیشن بھی جاری کردیا گیا

ساجد علی اتوار 23 مارچ 2025 15:38

اسلام آباد/لاہور ( اُردو پوائنٹ اخبارتازہ ترین۔ 23 مارچ 2025ء ) ملک میں عیدالفطر کیلئے تعلیمی اداروں میں تعطیلات کا اعلان کردیا گیا۔ تفصیلات کے مطابق عیدالفطر کے موقع پر تعلیمی اداروں میں چھٹیوں کا اعلان کیا گیا ہے اور اس حوالے سے باقاعدہ نوٹی فکیشن بھی جاری ہوچکا ہے، وفاقی وزارت تعلیم کی جانب سے جاری کردہ نوٹی فکیشن میں کہا گیا ہے کہ سرکاری تعلیمی اداروں میں تعطیلات 31 مارچ سے 4 اپریل تک ہوں گی اور نئے تعلیمی سیشن کا آغاز 7 اپریل سے ہوگا۔

(جاری ہے)

بتایا گیا ہے کہ حکومتِ پنجاب نے بھی صوبے میں عیدالفطر کی تعطیلات کے حوالے سے نوٹی فکیشن جاری کر دیا ہے، جس کے تحت صوبے بھر کے تعلیمی ادارے عیدالفطر کے موقع پر 31 مارچ سے 2 اپریل تک 3 دن کے لئے بند رہیں گے اور پنجاب میں عید کے بعد 4 اپریل سے تعلیمی ادارے دوبارہ کھل جائیں گے۔ اسی طرح سندھ حکومت نے بھی عید الفطر کی تعطیلات کا اعلان کردیا ہے، چیف سیکرٹری آصف حیدر شاہ کی جانب سے جاری نوٹیفکیشن میں صوبائی حکومت کا کہنا ہے کہ عید الفطر پر تین تعطیلات کا اعلان کیا گیا ہے جو پیر 31 مارچ سے بدھ 2 اپریل تک ہوں گی، اس دوران تمام سرکاری اور نیم سرکاری دفاتر بند رہیں گے، اس سے قبل وفاقی حکومت کی جانب سے بھی عید الفطر پر 3 تعطیلات کا اعلان کیا جاچکا ہے۔