امریکی ٹیرف کے نفاذ کو معطل کرنے کا فیصلہ عالمی تجارتی تنائو کم کرنے کی جانب بڑا قدم ہے، افتخار علی ملک

اتوار 13 اپریل 2025 11:50

لاہور (اُردو پوائنٹ اخبارتازہ ترین - اے پی پی۔ 13 اپریل2025ء) سارک چیمبر آف کامرس اینڈ انڈسٹری کے سابق صدر افتخار علی ملک نے کہا ہے کہ امریکی صدر ڈونلڈ ٹرمپ کی طرف سے ٹیرف کے نفاذ کو معطل کرنے کا فیصلہ خوش آئند اور بین الاقوامی تجارتی تعاون کو فروغ دینے اور تنائو کم کرنے کی جانب بڑا قدم ہے۔ اتوار کو یہاں ایک بیان میں انہوں نے کہا کہ اس التوا سے کاروباری اداروں کو چیلنجنگ ماحول میں نئی حکمت عملی کی تیاری اور تجارت کے فروغ کو برقرار رکھنے کا موقع ملے گا۔

(جاری ہے)

افتخار علی ملک نے عالمی منڈیوں کے مابین باہمی ربط پر زور دیتے ہوئے کہا کہ امریکی تجارتی پالیسیاں ابھرتی ہوئی معیشتوں پر گہرا اثر ڈالتی ہیں، ٹیرف کا فوری نفاذ ملتوی ہونے سے سپلائی چین میں رکاوٹیں کم ہوں گی اور جنوبی ایشیا میں سرمایہ کاروں کا اعتماد بڑھے گا۔ انہوں نے مساوی تجارتی فریم ورک کی جانب مسلسل کوششوں پر زور دیتے ہوئے کہا کہ سارک چیمبر آٹھوں جنوبی ایشیائی ممالک کی نمائندگی کرتا ہے اور طویل عرصے سے تجارتی رکاوٹوں کو کم کرنے اور علاقائی تعاون کو فروغ دینے کیلئے کام کر رہا ہے۔ انہوں نے امید ظاہر کی کہ ٹیرف کے التوا سے ترقی یافتہ اور ترقی پذیر دونوں طرح کی معیشتوں کو فائدہ ہوگا۔