ایس ایس پی آپریشنز کا شہر کے مختلف ناکہ جات و ڈیوٹی پوائنٹس کا دورہ

ڈیوٹی پر موجود پولیس افسران کو مستعدی سے اپنے فرائض سر انجام دینے کی ہدایت جاری

بدھ 16 اپریل 2025 21:55

اسلام آباد(اُردو پوائنٹ اخبارتازہ ترین - این این آئی۔ 16 اپریل2025ء) ایس ایس پی آپریشنز اسلام آباد محمد شعیب خان نے شہر کے مختلف ناکہ جات اور ڈیوٹی پوائنٹس کا دورہ کیااورڈیوٹی پر موجود پولیس افسران کو مستعدی سے اپنے فرائض سر انجام دینے کی ہدایات جاری کیں۔

(جاری ہے)

تفصیلات کے مطابق انسپکٹرجنرل آف پولیس اسلام آباد سید علی ناصر رضوی کے خصوصی احکامات کی روشنی میں ایس ایس پی آپریشنز اسلام آبادمحمد شعیب خان نے شہر کے مختلف ناکہ جات کا دورہ کیا ،پولیس افسران سے ملاقات کی اور انہیں اپنے فرائض مستعدی اور انتہائی چوکس ہو کر سر انجام دینے کی ہدایت کی،انہوں نے افسران کو مزید احکامات جاری کرتے ہوئے کہا کہ وہ ناکہ جات پر ڈیوٹی کے دوران مشکوک عناصر اور جرائم پیشہ عناصر کے خلاف بھرپور کریک ڈاؤن عمل میں لائیں،عدالتی مفروران اور اشتہاری ملزمان کی گرفتاریوں کو بھی یقینی بنایا جائے، ایس ایس پی آپریشنز اسلام آبادنے مزید کہا کہ تمام افسران وفاقی دارلحکومت اسلام آبادمیں جرائم کی بیخ کنی کے لئے اپنی ڈیوٹی ایمانداری اور دیانتداری سے ادا کریں،ہم سب اس شہر اور اسکے باسیوں کی جان و مال کی حفاظت کو ممکن بنائیں گے،تمام افسران دوران چیکنگ شہریوں کے ساتھ حسن اخلاق سے پیش آئیں، انہوں نے مزید کہا کہ ہم نے شہریوں کو تحفظ کا احساس دلانا ہے ،شہریوں کی جان و مال کی حفاظت اور کرائم کنٹرول کرنا ہمارا اولین مقصد ہے ، شہریوں سے گزارش ہے کہ وہ دوران چیکنگ پولیس افسران سے تعاون کریں ۔