Live Updates

سیمنٹ کی کم از کم ریٹیل قیمت مقرر کردی گئی،ایف بی آر نے کم از کم قیمت کا ایس آر او جاری کردیا

بدھ 30 اپریل 2025 17:18

لاہور(اُردو پوائنٹ اخبارتازہ ترین - این این آئی۔ 30 اپریل2025ء)فیڈرل بورڈ آف ریونیو نے سیمنٹ انڈسٹری کی جانب سے سیلز ٹیکس کی ادائیگی کیلئے کم از کم ریٹیل قیمت مقرر کردی ،نیا نظام یکم مئی 2025 سے نافذ العمل ہوگا۔ایف بی آر نے سیمنٹ کی نئی قیمت سے متعلق ایس آر او 746(I)/2025 جاری کیا ،،اس اقدام کا مقصد سیمنٹ ساز کمپنیوں کی جانب سے بڑے پیمانے پر انڈر انوائسنگ کی روک تھام ہے۔

(جاری ہے)

اس سلسلے میں قیمتوں کا تعین پاکستان بیورو آف اسٹیٹکس کی شائع کردہ قومی اوسط ریٹیل قیمت کی بنیاد پر کیا جائے گا۔نوٹیفکیشن کے مطابق سیلز ٹیکس ایکٹ 1990 کی شق 2 کے کلاز (46) کی پہلی پرووائزو کے تحت حاصل اختیارات کو استعمال کرتے ہوئے، ایف بی آر نے سیمنٹ کی کم از کم ریٹیل قیمت وہ مقرر کی ہے جو پی بی ایس کی ویب سائٹ پر حساس قیمت اشاریہ کے تحت ہر ماہ کی پہلی اور سولہویں تاریخ سے قبل شائع شدہ قومی اوسط قیمت ہوگی۔ یہ قیمت ہر پندرہ روزہ مدت کے آغاز پر لاگو ہوگی۔