Live Updates

مرغی کی قیمتوں میں مصنوعی اضافہ،کارٹل بنانے پر 8بڑی ہیچریوں کو 15کروڑ روپے جرمانہ

ہیچریز نے روزانہ کی بنیاد پر ایک واٹس ایپ گروپ چک ریٹ انانسمنٹ کے ذریعے چوزوں کی قیمتیں طے کیں‘تحقیقات میں انکشاف

بدھ 30 اپریل 2025 17:17

مرغی کی قیمتوں میں مصنوعی اضافہ،کارٹل بنانے پر 8بڑی ہیچریوں کو 15کروڑ ..

لاہور(اُردو پوائنٹ اخبارتازہ ترین - این این آئی۔ 30 اپریل2025ء)کمپیٹیشن کمیشن آف پاکستان نے پولٹری صنعت میں مصنوعی قیمتیں مقرر کرنے کے سنگین الزامات پر 8بڑی ہیچریوں کے خلاف فیصلہ کن کارروائی کرتے ہوئے 15کروڑ روپے جرمانہ عائد کر دیا ہے۔ کمیشن کے مطابق ان ہیچریوں نے کارٹل بنا کر ڈے اولڈ چوزے کی قیمت میں 346فیصد تک غیر فطری اضافہ کیا، جس کا براہ راست اثر چکن کی قیمتوں پر بھی پڑا۔

تحقیقات میں انکشاف ہوا ہے کہ ہیچریز نے روزانہ کی بنیاد پر ایک واٹس ایپ گروپ چک ریٹ انانسمنٹ کے ذریعے چوزوں کی قیمتیں طے کیں۔ بگ برڈ کمپنی کے مارکیٹنگ مینیجر ڈاکٹر شاہد اس گروپ میں نئی قیمتیں جاری کرتے رہے، اور صرف واٹس ایپ اور ٹیکسٹ میسج کے ذریعے 198بار قیمتیں طے کی گئیںجن میں 108بار ٹیکسٹ میسج اور 87بار واٹس ایپ پر قیمتیں شیئر کی گئیں۔

(جاری ہے)

کمیشن کا کہنا ہے کہ یہ ہیچریز ایک باقاعدہ کارٹل کے طور پر کام کر رہی تھیں، جو پنجاب، ملتان اور کراچی سمیت مختلف علاقوں میں یومیہ نرخ خود طے کرتیں۔ چوزے کی قیمت 17.92روپے سے بڑھ کر 79.92روپے تک جا پہنچی، جو مارکیٹ میں مصنوعی قلت اور مہنگائی کا سبب بنی۔صادق پولٹری اور اسلام آباد فیڈز نے کمیشن کی کارروائی کے خلاف حکم امتناع لے رکھا تھا، تاہم لاہور ہائی کورٹ کے فیصلے کے بعد کمپیٹیشن کمیشن نے شوکاز نوٹسز پر کارروائی مکمل کی اور جرمانے عائد کیے۔

کمپیٹیشن کمیشن کے چیئرمین ڈاکٹر کبیر سدھو نے اس موقع پر خبردار کیا ہے کہ کوئی بھی تجارتی تنظیم اگر قیمتوں کے گٹھ جوڑ میں ملوث پائی گئی تو اس کے خلاف سخت قانونی کارروائی کی جائے گی۔ ان کا کہنا تھا کہ تجارتی ایسوسی ایشنز کا مقصد صرف اپنے اراکین کی فلاح اور انڈسٹری کی بہتری ہونا چاہیے، نہ کہ مارکیٹ کو یرغمال بنانا۔ڈاکٹر سدھو نے عوام اور اسٹیک ہولڈرز سے اپیل کی ہے کہ اگر کسی بھی کارٹل یا مصنوعی قیمت سازی کی سرگرمی کا علم ہو تو وہ فوری طور پر کمیشن کو اطلاع دیں تاکہ منافع خوروں کے خلاف بروقت اور مثر کارروائی کی جا سکے۔