موسم کی سختی ٹام کروزکو نہ روک سکی، شوٹنگ میں مصروف

بدھ 23 اپریل 2025 19:37

لاس اینجلس (اُردو پوائنٹ اخبارتازہ ترین - این این آئی۔ 23 اپریل2025ء)ٹام کروز مشن امپاسیبل دی فائنل ریکوننگ کیلئے شدید برفانی حالات میں بھی شوٹنگ میں مصروف ہیں۔میڈیا رپورٹ کے مطابق ہالی ووڈ کے سینئر اداکار ٹام کروز کبھی سخت ترین شوٹنگ شیڈول سے پیچھے نہیں ہٹے، ان کی آنے والی فلم مشن امپاسیبل: دی فائنل ریکوننگ 23مئی کو ریلیز ہونے جا رہی ہے، جو اس مشہور اور ایکشن تھرلر فرنچائز کا آخری باب ہوگا۔

ٹام کروز نے سوشل میڈیا پلیٹ فارم ایکس پر فلم کے سیٹ سے ایک خصوصی ویڈیو شیئر کی، جو مداحوں کو ناروے اور نارتھ پول کے درمیان واقع برفانی علاقے اسوالبارڈ کی خوبصورتی اور سخت ترین موسم کی جھلک دکھاتی ہے۔ٹام کروز نے اسوالبارڈ کو ناقابل یقین حد تک حسین قرار دیتے ہوئے کہا کہ یہ واقعی ایک شاندار جگہ ہے جہاں فلم بندی کا موقع ملا، یہ ایک انوکھا تجربہ ہے۔

(جاری ہے)

فلم کے ساتھی اداکار سائمن پیگ نے بھی سخت سردی کا ذکر کرتے ہوئے کہا اگر آپ آئس کیپ پر شوٹنگ کرنا چاہتے ہیں تو تیاری کرلیں، کیونکہ درجہ حرارت انتہائی حدوں کو چھوتا ہے، آرکٹک کا ٹھنڈا تھپیڑا ہمیں براہِ راست چہرے پر محسوس ہوا۔ہدایت کار کرسٹوفر مک کواری نے شدید سردی میں شوٹنگ کے چیلنجز پر روشنی ڈالتے ہوئے کہا آپ مائنس 40ڈگری کے حالات کو جھوٹ موٹ دکھا نہیں سکتے، چند سیکنڈ کیلئے دستانے اتاریں اور انگلیاں سن ہونا شروع ہو جاتی ہیں۔ فلم کی ٹیم کی طرف سے ایک نوٹ بھی جاری کیا گیا جس میں لکھا تھا کہ یہ ایک اعزاز ہے کہ ہم اسوالبارڈ جیسی جگہ کو دنیا کے سامنے لا رہے ہیں، یہ ہر لحاظ سے دِل موہ لینے والا ہے اور ہم بے چینی سے منتظر ہیں کہ آپ اسے سینما میں دیکھیں۔