پی آئی اے نجکاری کیلئے دوبارہ اشتہار جاری‘ اظہار دلچسپی جمع کرانے کی آخری تاریخ 3 جون ہے‘ مشیر برائے نجکاری محمد علی

جمعرات 24 اپریل 2025 19:25

qاسلام آباد(اُردو پوائنٹ اخبارتازہ ترین - آن لائن۔ 24 اپریل2025ء)وزیراعظم کے مشیر برائے نجکاری محمد علی نے کہا ہے کہ پی آئی اے کی نجکاری کیلئے دوبارہ اشتہار جاری کر دیا گیا ہے جس میں اظہار دلچسپی جمع کرانے کی آخری تاریخ 3 جون ہے‘اس بار شرائط میں کچھ تبدیلی کی ہے جس کا مقصد زیادہ اور بہتر سرمایہ کاروں کو راغب کرنا ہے۔ صحافیوں سے گفتگو کرتے ہوئے محمد علی نے کہا کہ پی آئی اے کی نجکاری کے لیے دوبارہ اشتہار جاری کر دیا گیا ہے جس میں اظہار دلچسپی جمع کرانے کی آخری تاریخ 3 جون ہے۔

(جاری ہے)

ہم نے اس بار شرائط میں کچھ تبدیلی کی ہے جس کا مقصد زیادہ اور بہتر سرمایہ کاروں کو راغب کرنا ہے۔انہوں نے کہا کہ پی آئی اے کے حوالے سے پچھلی نجکاری کی کوشش کے بعد سے آنے والی خبریں بڑی مثبت ہیں اور ان خبروں کا قیمت پر اچھا اثر ہو گا۔پی آئی اے کی نجکاری کے لیے بولی ممکنہ طور پر سال کی آخری سہ ماہی میں منعقد کی جائے گی۔انہوں نے بتایا کہ ڈسکوز کی نجکاری پر بھی کام تیزی سے جاری ہے۔پہلے مرحلے میں شامل ڈسکوز کی نجکاری بھی سال کے آخر تک کر لی جائے گی جس کے لیے ٹرانزیکشن سٹرکچر کی منظوری جولائی تک لے لی جائے گی۔