شاہ رخ خان کی میٹ گالا میں شرکت، عالمی میڈیا پہچاننے سے قاصر

میٹ گالا میں شرکت بچوں کے کہنے پر کی ہے، شرمیلا ہوں ،نروس محسوس کررہا ہوں، اداکار

منگل 6 مئی 2025 22:16

شاہ رخ خان کی میٹ گالا میں شرکت، عالمی میڈیا پہچاننے سے قاصر

نیویارک (اُردو پوائنٹ اخبارتازہ ترین - این این آئی۔ 06 مئی2025ء)بالی ووڈ کنگ شاہ رخ خان نے فیشن کی دنیا کے سب سے بڑے ایونٹ میٹ گالا 2025 میں ڈیبیو کیا لیکن یہاں دلچسپ واقعہ اس وقت پیش آیا جب عالمی میڈیا شاہ رخ خان کو پہنچاننے سے قاصر رہا۔شاہ رخ خان پہلے مرد اداکار ہیں جنہوں نے بالی ووڈ انڈسٹری سے میٹ گالا میں شرکت کی۔ ان کی میٹ گالا میں شرکت کی متعدد ویڈیوز سوشل میڈیا پر وائرل ہیں جنہیں ان کے مداح و صارفین کی جانب سے خوب پسند کیا جا رہا ہے۔

(جاری ہے)

وائرل ویڈیومیں شاہ رخ خان کو میٹ گالا کے ریڈ کارپٹ پر کھڑے میڈیا کے ساتھ بات چیت کرتے دیکھا جا سکتا ہے، اداکار کو انٹرویو دینے سے قبل اپنا تعارف کرواتے اور بعد ازاں اپنے اسٹائل سے متعلق تفصیل بتاتے دیکھا جا سکتا ہے۔دوسری جانب میٹ گالا 2025 میں ووگ کو دیے گئے انٹرویو میں شاہ رخ خان نے بتایا کہ میں نے میٹ گالا میں شرکت اپنے بچوں کے کہنے پر کی ہے، میں بہت شرمیلا ہوں اور بہت نروس محسوس کر رہا ہوں۔ انہوں نے کہاکہ مجھ پر میٹ گالا میں شرکت کیلئے پہلے میرے ڈیزائنر سبیاساچی کی جانب سے دبائو ڈالا گیا اور بعد ازاں میرے بچوں نے مجھے میٹ گالا میں شرکت کیلئے کہا، مجھ سے زیادہ میرے بچے میٹ گالا کیلئے پرجوش تھے۔