متحدہ عرب امارات ، ایشیائی خاتون کا غلطی سے اکاونٹ میں منتقل ہونے والی رقم واپس کرنے سے انکار

پیر 12 مئی 2025 08:40

دبئی (اُردو پوائنٹ اخبارتازہ ترین - اے پی پی۔ 12 مئی2025ء) متحدہ عرب امارات میں دبئی کی سول کورٹ نے ایک ایشیائی خاتون کو غلطی سے اس کے اکاونٹ میں منتقل ہونے والے 6 ہزار درھم واپس کرنے اور 5 ہزار درھم کا ہرجانہ ادا کرنے کا حکم دیا ہے۔امارات الیوم کے مطابق ایک نجی کمپنی کے ملازم نے دبئی کورٹ میں دخواست دی کہ غلطی سے 6 ہزار درھم ایک ایشیائی خاتون کے اکاونٹ میں چلے گئے۔

متعدد بار رابطہ کیا مگر خاتون نے ابتدا میں ٹال مٹول سے کام لیا بعدازاں رقم واپس کرنے سے انکار کردیا۔عدالت سے درخواست کی کہ وہ معمولی ملازم ہے اور اتنا بڑا خسارہ برداشت نہیں کرسکتا کیونکہ اس کی ماہانہ تنخواہ ہی 4 ہزاردرھم ہے۔ اگر وہ یہ رقم اپنی تنخواہ سے ادا کرتا ہے تو اسے زیادہ نقصان اٹھانا پڑے گا۔

(جاری ہے)

سول کورٹ نے مقدمہ کی سماعت کا آغاز کیا اور تمام شواہد و بینک ڈیپازٹ سلپ کی تصدیق کرنے کے بعد ایشیائی خاتون کو اس بات کا پابند کیا کہ وہ غلطی س منتقل ہونے والی رقم لوٹائے اور ایک ہزار درھم ہرجانہ ادا کرے۔

ابتدائی عدالتی حکم کی توثیق اپیل کورٹ نے بھی کردی اس کے باوجود خاتون نے عدالتی حکم پرعمل کرنے سے انکار کردیا۔خاتون کی جانب سے مسلسل 6 ماہ تک کسی قسم کا جواب نہ ملنے پر فوجداری عدالت سے رجوع کیا گیا۔فوجداری عدالت نے خاتون کی جانب سے طویل مدت تک عدالتی فیصلے پر عمل نہ کرنے پر فیصلہ سناتے ہوئے کہا کہ مدعی کو اس عرصے میں جس ذہنی اذیت کا سامنا کرنا پڑا اس کے تدارک کے لیے 5 ہزار درھم ہرجانہ بھی ادا کیا جائے جو اصل رقم 6 ہزار درھم کے علاوہ ہوگا۔