فیصل آباد،گھریلو افراد کوگندم ذخیرہ کرتے وقت بھڑولوں اور بوریوں میں نیم کے پتے رکھنے کی ہدایت

پیر 12 مئی 2025 15:32

فیصل آباد (اُردو پوائنٹ اخبارتازہ ترین - اے پی پی۔ 12 مئی2025ء) محکمہ زراعت نے گھریلو افراد کوگندم ذخیرہ کرتے وقت بھڑولوں اور بوریوں میں نیم کے پتے رکھنے کی ہدایت کی ہے۔ اسسٹنٹ ڈائریکٹر محکمہ زراعت توسیع فیصل آباد عامر صدیق نے کہا ہے کہ گندم کو محفوظ کرناایک بڑا مسئلہ ہے جس کے لئے کاشتکاروں، کسانوں اور عام افراد کو خصوصی رہنمائی کی ضرورت ہوتی ہے اور گندم کو ذخیرہ کرتے وقت اسے حشرات اور مختلف بیماریوں سے بچانے کے لئے حفاظتی اقدامات پر عملدرآمد کرنا ضروری ہے ۔

انہوں نے کہاکہ عام طور پر کاشتکار اور بڑی تعداد میں گھریلو افراد سال بھر کی گندم لے کر گھروں یا ڈیروں پر بھڑولوں اور بوریوں میں ذخیرہ کرلیتے ہیں لیکن اکثر اوقات یہ گندم حفاظتی تدابیر پر عملدرآمد نہ ہونے کے باعث خراب ہوناشروع ہوجاتی ہے۔

(جاری ہے)

انہوں نے کہاکہ دیہاتوں میں کسان کھانے اور بیج کے لئے اناج تقریباً ایک ہی جگہ ذخیرہ کرلیتے ہیں اور اس مقصد کے لئے وہ پٹ سن کی بوریوں میں اناج بھر کر گھر کے کمروں یا برآمدوں میں اینٹوں کے اوپر یا لکڑی کے تختوں پر رکھ دیتے ہیں۔

اسی طرح بعض افراد صحن میں رکھے گارے یا لوہے کے بھڑولوں میں بھی اناج ذخیرہ کرتے ہیں جنہیں حشرات الارض کے ساتھ ساتھ درجہ حرارت میں کمی بیشی بھی متاثر کرتی ہے۔ انہوں نے کہاکہ حفاظتی اقدامات پر عمل کرکے گندم کو خراب ہونے سے بچایاجاسکتاہے۔

Facebook Twitter Google + Share on Whatsapp

فیصل آباد،گھریلو افراد کوگندم ذخیرہ کرتے وقت بھڑولوں اور بوریوں میں نیم کے پتے رکھنے کی ہدایت

مزید زراعت کی خبریں