جامعہ زرعیہ فیصل آبادنے بی ایس باٹنی، زوآلوجی، فزکس، کیمسٹری، بائیو کیمسٹری، شماریات اور ریاضی (ایوننگ) کے ڈگری پروگرام شروع کرنے کی منظوری دےدی

منگل 13 مئی 2025 14:53

فیصل آباد (اُردو پوائنٹ اخبارتازہ ترین - اے پی پی۔ 13 مئی2025ء) جامعہ زرعیہ فیصل آباد نے مین کیمپس میں بی ایس باٹنی، زوآلوجی، فزکس، کیمسٹری، بائیو کیمسٹری، شماریات اور ریاضی (ایوننگ) کے ڈگری پروگرامز شروع کرنے کی منظوری دےدی ہے جبکہ جامعہ زرعیہ فیصل آباد کے وائس چانسلر پروفیسر ڈاکٹر ذوالفقار علی نے کہا کہ زرعی ماہرین معیاری تحقیقی امور اور ہنر مند افرادی قوت کی تیاری کو یقینی بنانے کےلئے تمام ممکنہ کاوشیں عمل میں لائیں تاکہ زرعی چیلنجز سے نبردآزما ہوا جا سکے۔

وہ اکیڈمک کونسل کے اجلاس کی صدارت کے دوران اظہار خیال کررہے تھے۔اجلاس میں سب کیمپس بورے والا وہاڑی میں بی ایس کیمسٹری، بی ایس باٹنی اور بی ایس زوآلوجی (مارننگ) اور بی ایس سافٹ ویئر انجینئرنگ ایوننگ ڈگری پروگرامز کی بھی منظوری دی گئی۔

(جاری ہے)

پروفیسر ڈاکٹر ذوالفقار علی نے کہا کہ ہمیں دورحاضر کے چیلنجز کو مدنظر رکھتے ہوئے ہنر مند افرادی قوت تیار کرنا ہو گی جو علاقائی، قومی اور بین الاقوامی ضروریات کو پورا کر سکے۔

انہوں نے اس امر پر زور دیا کہ تمام ڈگری پروگرامز اور ہنر مند کورسز کو قومی ضروریات کو مدنظر رکھتے ہوئے ترتیب دیا جانا چاہیے۔ انہوں نے کہا کہ تعلیم کے معیار کو بہتر بنانے کے لیے تمام ممکنہ اقدامات کیے جا رہے ہیں جو جدید چیلنجز سے نمٹنے میں معاون ثابت ہوں گے۔ رجسٹرار عمر سعید قادری نے اجلاس کا ایجنڈا پیش کیا۔