فیصل آباد،کاشتکاروں کو ٹیوب ویل کے پانی سے سیراب ہونے والی اراضی کو نائٹروجنی،فاسفورسی اورپوٹاش کی کھادڈالنے کی ہدایت

بدھ 21 مئی 2025 16:03

فیصل آباد (اُردو پوائنٹ اخبارتازہ ترین - اے پی پی۔ 21 مئی2025ء) ڈویژنل ڈائریکٹر محکمہ زراعت توسیع فیصل آباد چوہدری خالد محمودنے کاشتکاروں کو ٹیوب ویل کے پانی سے سیراب ہونے والی اراضی میں نائٹروجنی،فاسفورسی اورپوٹاش کی کھادڈالنے کی ہدایت کی ہے۔ انہوں نے کہا ہے کہ کپاس کی بہتر فصل کے لئےکھادوں کا متناسب استعمال انتہائی اہمیت کا حامل ہے لہٰذا کاشتکار ماہرین زراعت اور محکمہ زراعت کے فیلڈ سٹاف کی مشاورت سے متناسب کھادوں کا بروقت استعمال یقینی بنائیں تاکہ کپاس کی معیاری اور فی ایکڑ بہترین پیداوار کا حصول ممکن ہو سکے۔

انہوں نے کہا کہ کاشتکاروں کو چاہیے کہ وہ زیادہ پیداوار کے لئے کپاس کی بروقت کاشت کا عمل جلد مکمل کر لیں تاکہ پودے توانا اور مضبوط ہو سکیں اور فصل وائرس اور کیڑوں کا مقابلہ کرنے کی صلاحیت کی حامل بن سکے۔

(جاری ہے)

انہوں نے کہا کہ جن زمینوں میں صرف ٹیوب ویل کا پانی لگ رہا ہے وہاں نائٹروجنی اور فاسفورسی کھاد کے علاوہ پوٹاش کھاد بھی ضرور استعمال کی جائے اس کام سے بڑھوتری میں کوئی رکاوٹ نہیں آئے گی۔

انہوں نے کہا کہ کپاس کی اگیتی فصل اس وقت نرم حالت میں ہونے کی وجہ سے لشکری سنڈی کے حملےکے خطرے سے دوچار ہو سکتی ہے لہٰذا ایسی کسی بھی علامت یا شکایت کا تدارک بروقت ضروری ہے۔انہوں نے کہا کہ اس وقت درجہ حرارت میں اضافے کے باعث کپاس پر تھرپس،سست تیلہ سمیت دیگر رس چوسنے والے کیڑے حملہ آور ہیں لہٰذا ان پر کڑی نظر رکھنے کی ضرورت ہے۔انہوں نے کپاس کے کاشتکاروں کو ہدایت کی کہ وہ محکمہ زراعت کے عملے سے مسلسل رابطہ میں رہیں اور ضرورت پڑنے پر سفارش کردہ زہروں کا فوری استعمال یقینی بنائیں کیونکہ بیماری کے حملہ کی صورت میں زرا سی بھی کوتاہی فصل کے بڑے نقصان کا باعث بن سکتی ہے۔