کامسیٹس یونیورسٹی اسلام آباد واہ کیمپس میں سالانہ اوپن ہاؤس اور جاب فیئر کا کامیابی سے انعقاد

اسلام آباد (اُردو پوائنٹ اخبارتازہ ترین - اے پی پی۔ 29 مئی2025ء) کامسیٹس یونیورسٹی اسلام آباد واہ کیمپس میں جمعرات کو سالانہ اوپن ہاؤس اور جاب فیئر کا کامیابی سے انعقاد کیا گیا جو کہ سمسٹر بہار 2025 کے گریجویٹس کو اپنی صلاحیتوں کا مظاہرہ کرنے اور آجروں سے رابطے کا ایک متحرک پلیٹ فارم ثابت ہوا۔ جاب فیئر میں کمپیوٹر سائنس، الیکٹریکل انجینئرنگ، مکینیکل انجینئرنگ، سول انجینئرنگ اور مینجمنٹ سائنسز کے شعبہ جات سے 303 فائنل ایئر طلباء نے 125 جدید فائنل ایئر پراجیکٹس پیش کئے جو ان کی صنعت کے لئے تیاری اور علمی مہارت کا مظہر تھے۔

85 سے زائد کمپنیوں نے اس ایونٹ میں شرکت کی جہاں انہوں نے طلباء کے پراجیکٹس کا جائزہ لیا، موقع پر انٹرویوز کئے اور انٹرن شپ و ملازمت کی پیشکشیں کیں۔

(جاری ہے)

ایونٹ کا آغاز پروفیسر ڈاکٹر احسان اللہ منیر اور ڈاکٹر مشتاق احمد بھٹی (انچارج، کیریئر ڈویلپمنٹ سینٹر - سی ڈی سی) کے خیرمقدمی کلمات سے ہوا جنہوں نے سی ڈی سی کے کردار کو طلباء کی پیشہ وارانہ ترقی اور صنعت سے روابط کے فروغ میں اجاگر کیا۔

تقریب میں معروف سابق طلباء جن میں محمد رافیع حسن خان (مینجمنٹ سائنسز) اور محمد طلحہ (کمپیوٹر سائنس) شامل تھے، نے طلباء کو اپنی کامیابی کی کہانیاں سنا کر متاثر کیا۔ محمد طلحہ نے سی یو آئی واہ کے اساتذہ کے ساتھ مشترکہ تحقیقی کوششوں کی تجویز بھی دی تاکہ تعلیم اور صنعت کے درمیان خلیج کو کم کیا جا سکے خاص طور پر بین الاقوامی روزگار کے مواقع کو بڑھانے پر توجہ دی گئی۔

ایونٹ کے مہمانِ خصوصی پی او ایف کے نمائندے اور پی ای سی کے رکن انجینئر ڈاکٹر اعجاز بشیر جنجوعہ تھے ۔ انہوں نے پی ای سی کے مکمل فنڈڈ انٹرن شپ پروگراموں کی اہمیت پر زور دیا اور نصاب کی تیاری میں صنعت و جامعات کے باہمی تعاون کی ضرورت پر روشنی ڈالی۔واہ انڈسٹریز لمیٹڈ کے بریگیڈیئر (ر) عبدالنعیم بھٹی مہمانِ اعزاز تھے ۔ انہوں نے طلباء کو اخلاقی اقدار، علم اور مقصدیت سے بھرپور زندگی گزارنے کی ترغیب دی۔

انہوں نے سی یو آئی واہ کی اس بامقصد تقریب کے انعقاد کو سراہا اور ایسے اشتراکات کو مزید مضبوط بنانے کی ضرورت پر زور دیا تاکہ گریجویٹس کو موجودہ مارکیٹ کے تقاضوں کے مطابق تیار کیا جا سکے۔تقریب کے اختتام پر بہترین ایف وائی پی ٹیموں کو اسناد تقسیم کی گئیں اور پروفیسر ڈاکٹر احسان اللہ منیر کی جانب سے شکریہ کی پرخلوص تقریر کے ساتھ ایونٹ کا اختتام ہوا جس میں انہوں نے ٹیلنٹ کی پرورش اور قومی ترقی و صنعتی جدت کی حمایت کرنے والی شراکت داریوں کے عزم کا اعادہ کیا۔