ڈرامہ’’ جڑواں‘‘ نے ناظرین کو اپنے سحر میں جکڑ لیا

ہر ہفتے ناظرین اس کے نئے موڑ ، کرداروں کی کشمکش اور جذباتی مناظر کے منتظر رہتے تھے اور یہی اس کی اصل کامیابی تھی

منگل 3 جون 2025 17:38

اسلام آباد (اُردو پوائنٹ اخبارتازہ ترین - این این آئی۔ 03 جون2025ء)ہم ٹی وی کے بینر تلے پیش کیا جانے والا ڈرامہ’’ جڑواں‘‘حال ہی میں اپنے اختتام کو پہنچا۔ یہ ڈرامہ نہ صرف ریٹنگز کے میدان میں کامیاب رہا بلکہ اس نے ناظرین کو جذباتی طور پر بھی اپنے سحر میں جکڑ لیا۔ ہر ہفتے ناظرین اس کے نئے موڑ ، کرداروں کی کشمکش اور جذباتی مناظر کے منتظر رہتے تھے اور یہی اس کی اصل کامیابی تھی۔

جڑواں کی کہانی دو بہنوں سارا اور زارا کے گرد گھومتی تھی جو بچپن میں ایک دوسرے سے جدا ہو گئی تھیں ۔ بظاہر ایک جیسے چہرے رکھنے والی ان جڑواں بہنوں کی زندگیاں، ماحول، پرورش اور شخصیات ایک دوسرے سے یکسر مختلف تھیں۔ سارا ایک نرم مزاج، خوفزدہ اور محتاط لڑکی کے طور پر دکھائی گئی تھی جو باپ اور پھوپھی کے زیرسایہ پلی بڑھی تھی۔

(جاری ہے)

دوسری طرف زارا ایک خود اعتماد، بے باک اور حقیقت پسند لڑکی تھی جس کی پرورش اس کی ماں نے کی تھی جو ماضی کی تلخیوں سے اسے محفوظ رکھنے کی تگ و دو میں مصروف رہی۔

یہ کہانی صرف بہنوں کی جدائی پر نہیں بلکہ شناخت، قسمت، والدین کے فیصلوں اور خاندانی تعلقات کی پیچیدگیوں پر مبنی تھی۔ ناظرین نے ہر قسط میں ان بہنوں کے درمیان بڑھتی ہوئی قربت، غلط فہمیوں اور جذباتی کشمکش کو شدت سے محسوس کیا۔ڈرامے کی کامیابی میں سب سے نمایاں کردار اداکارہ عینا آصف کا تھا جنہوں نے سارا اور زارا جیسے دو مختلف کرداروں کو بے مثال مہارت سے نبھایا۔ ان کے لہجے، باڈی لینگویج، تاثرات اور رویوں میں اس قدر فرق تھا کہ ناظرین کو دونوں کردار الگ الگ شخصیات محسوس ہوئے۔

Facebook Twitter Google + Share on Whatsapp

ڈرامہ’’ جڑواں‘‘ نے ناظرین کو اپنے سحر میں جکڑ لیا

ہر ہفتے ناظرین اس کے نئے موڑ ، کرداروں کی کشمکش اور جذباتی مناظر کے منتظر رہتے تھے اور یہی اس کی اصل کامیابی تھی

مزید فن و فنکار کی خبریں