پاکستانی ٹی وی ڈراموں کی صفِ اول کی اداکار خالدہ ریاست کی برسی 26اگست کومنائی جائیگی

ہفتہ 23 اگست 2025 12:39

لاہور (اُردو پوائنٹ اخبارتازہ ترین - این این آئی۔ 23 اگست2025ء) پاکستانی ٹی وی ڈراموں کی صفِ اول کی اداکار خالدہ ریاست کی 29ویں برسی 26اگست کو منائی جائے گی ۔لاکھوں ناظرین کو اپنی عمدہ پرفارمنس سے متاثر کرنے والی خالدہ ریاست یکم جنوری 1953ء کو کراچی میں پیدا ہوئیں۔باصلاحیت فنکار نے اپنے فنی کیریئر کا آغاز 70 کی دہائی میں ڈرامہ سیریل ’’نامدار ‘‘سے کیا، جس میں ان کے ہمراہ اداکار شکیل نے اہم کردار ادا کیا،لیکن انہیں مقبولیت معروف ڈرامہ نگار حسینہ معین کی تحریر کردہ ڈرامہ سیریل ’’بندش ‘‘سے ملی، جس کو پی ٹی وی ڈرامہ پروڈیوسر محسن علی نے پروڈیوس کیا تھا۔

انور مقصود کے اسکرپٹ پر مبنی طویل دورانیے کے کھیل ’’ہاف پلیٹ ‘‘میں ان کی اداکار معین اختر کے ساتھ کلاسیک کردار نگاری ڈرامہ شائقین کو آج بھی یاد ہے۔

(جاری ہے)

انہوں نے اپنی ہم عصر فنکاروں روحی بانو، عظمیٰ گیلانی اور دیگر کے سامنے لاتعداد ڈراموں اور سیریل میں کام کیا۔ان کے مشہور ڈراموں میں پناہ، بندش، دھوپ، دیوار، کھویا ہوا آدمی، سلور جوبلی، تعبیر، اب تم جاسکتے ہو اور پڑوسی کے علاوہ دیگر شامل ہیں۔

فنکارانہ زندگی ملک کے دیگر شہروں میں گزارنے کے بعد زندگی کے آخری ایام انہوں نے مقامی ہسپتال میں خفیہ طور پر بسر کیے، وہ سرطان کے مرض میں مبتلا تھیں۔خالدہ ریاست کی آخری ڈرامہ سیریل ’’پڑوسی ‘‘تھی جس کے بعد انہوں نے فنی دنیا سے کنارہ کشی اختیار کرلی، لوگوں کو خوشیاں دینے والی یہ باصلاحیت اداکار 26اگست 1996ء کو اپنے خالق حقیقی سے جا ملیں۔