چینی صدر کے دو پہاڑوں کے نظریے کے فروغ کے لیے بحریہ یو نیورسٹی میں تقر یب کا انعقاد

بدھ 4 جون 2025 16:44

اسلام آباد (اُردو پوائنٹ اخبارتازہ ترین - اے پی پی۔ 04 جون2025ء) چینی صدر شی جن پنگ کے "دو پہاڑوں کے نظریے" سے متاثر توانا تھیم "شفاف پانی اور سرسبز پہاڑ انمول اثاثے ہیں" کے تحت چائنا میڈیا گروپ (سی ایم جی) اور بحریہ یونیورسٹی کے اشتراک سے عالمی یوم ماحولیات کی مناسبت سے تقریب کا انعقاد کیا گیا۔ اس ایونٹ کا مقصد تعلیمی، تخلیقی اور ثقافتی سرگرمیوں کے ذریعے ماحولیاتی شعور اجاگر کرنا اور انفرادی سطح پر مثبت عمل کی ترغیب دینا تھا۔

تقریب میں 80 سےزیادہ طلبہ اور ممتاز ماحولیاتی کارکنوں نے شرکت کی۔ بحریہ یونیورسٹی کے شعبہ سماجی علوم کے ڈین ڈاکٹر آدم سعود نے صدر شی جی پنگ کے دو پہاڑوں کے نظریے کی اہمیت پر زور دیتے ہوئے کہا کہ ماحولیاتی تحفظ صرف حکومت کی ذمہ داری نہیں بلکہ ہر فرد کا ذاتی فریضہ ہے۔

(جاری ہے)

ہر درخت جو لگایا جائے، ہر بوند جو بچائی جائے، ایک بہتر زمین کی جانب ایک قدم ہے۔

انہوں نے طلبہ کو تلقین کی کہ وہ روزمرہ زندگی میں چھوٹے مگر موثر اقدامات کے ذریعے ماحول دوست طرز عمل اپنائیں۔ تقریب کے دوران طلبہ نے مختلف تخلیقی سرگرمیوں میں حصہ لیا جن میں پوسٹر پینٹنگ، ماڈل ڈسپلے اور فوٹوگرافی کے مقابلے شامل تھے جو ماحولیاتی تحفظ کی تھیم پر مبنی تھے۔ طلبہ کی تخلیقی صلاحیت اور جوش و جذبے کو حاضرین نے خوب سراہا۔

ججز نے ہر تخلیق میں موجود فکری گہرائی اور انفرادیت کو سراہا اور اسے سائنسی علم کو موثر فن میں ڈھالنے کی شاندار کوشش قرار دیا۔ ایونٹ کا نقطہ عروج ایک پراثر سٹیج ڈرامہ تھا جو ماحولیاتی غفلت کے نتائج اور پائیدار طرز عمل سے پیدا ہونے والی امید کی عکاسی کرتا تھا۔ یہ پرفارمنس صدر شی کے "دو پہاڑوں کے نظریے" کا عملی عکس تھی جسے حاضرین نے بھرپور داد دی۔