Live Updates

اسرائیل نے جنگ بندی کی امریکی تجویز قبول کر لی

حماس نے تجویز مسترد کر دی،جنگ بندی مذاکرات تعطل کا شکار

جمعہ 6 جون 2025 12:49

اسرائیل نے جنگ بندی کی امریکی تجویز قبول کر لی

غزہ /برلن(اُردو پوائنٹ اخبارتازہ ترین - این این آئی۔ 06 جون2025ء)غزہ کی پٹی میں جنگ بندی کے مذاکرات تعطل کا شکار ہوگئے ۔ اسی دوران اسرائیلی وزیر خارجہ گیڈیون ساعر نے امریکی تجویز کے لیے اپنے ملک کی قبولیت کا اعادہ کیا ہے۔میڈیارپورٹس کے مطابق گیڈون ساعر نے جرمن ہم منصب کے ساتھ برلن میں منعقد ایک مشترکہ پریس کانفرنس میں کہا کہ اسرائیل نے 19 دن قبل خصوصی ایلچی سٹیو وٹکوف کی قیدیوں کے تبادلے کے معاہدے کی تجویز کو قبول کر لیا تھا۔

انہوں نے حماس پر اس تجویز کو مسترد کرنے کا الزام لگایا اور کہا کہ اسرائیل ایک ایسے معاہدے تک پہنچنے کے اپنے ارادے میں سنجیدہ ہے جو جنگ بندی کا باعث بنے اور تمام زیر بحث بیرونی مسائل کو حل کرے۔دریں اثنا جرمن وزیر خارجہ نے محصور غزہ کی پٹی میں مزید انسانی امداد داخل کرنے کی اجازت دینے کا مطالبہ کیا۔

(جاری ہے)

انہوں نے اسرائیلی حکومت کے مغربی کنارے میں 22 نئی بستیوں کی تعمیر کی اجازت کے اعلان کی بھی مذمت کی۔

تاہم انہوں نے اسی دوران اس بات کی تصدیق بھی کی کہ ان کا ملک اسرائیل کو ہتھیار فراہم کرتا رہے گا۔ انہوں نے کہا کہ اسرائیل کو اپنا دفاع کرنے کی ضرورت ہے۔دوسری طرف حماس نے اسرائیلی فریق پر وٹکوف کی تجویز کو نظرانداز کرنے کا الزام لگایا ہے۔ تحریک کے ایک رہنما محمود مرداوی نے کہا ہے کہ اسرائیل نے جنگ بندی کی تجویز کو نظرانداز کیا جسے فلسطینی دھڑوں اور امریکی ثالث نے اپنے اندرونی مسائل حل کرنے کے لیے منظور کیا تھا۔

انہوں نے بھوک کی پالیسی کو دنیا کے ماتھے پر ایک دھبہ قرار دیا۔ حماس نے پہلے امریکی صدر ڈونلڈ ٹرمپ کے مشرق وسطی کے ایلچی کی طرف سے تجویز کردہ معاہدے کے بارے میں اختلافات کے نکات پر سمجھوتہ کرنے کے لیے فوری طور پر بالواسطہ مذاکرات شروع کرنے کی آمادگی کا اظہار کیا تھا۔وٹکوف کی تجویز میں 10 اسرائیلی یرغمالیوں اور 18 لاشوں کو حوالے کرنے کے بدلے میں 60 دن کی جنگ بندی کی تجویز دی گئی تھی۔ پچھلے ہفتے وٹکوف کی تجویز کے جواب میں حماس نے معاہدے میں شامل دس زندہ یرغمالیوں اور اٹھارہ لاشوں کی رہائی کے شیڈول میں تبدیلی کا مطالبہ کیا تاکہ یہ 60 دن کی جنگ بندی کے دوران 6 قسطوں میں انجام پائے۔ حماس نے اسرائیلی فوج کے مکمل انخلا کا بھی مطالبہ کیا۔