سعودی عرب،براہ راست دھوپ میں کام کرنے پر پابندی

پابندی 15 جون سے روزانہ دوپہر 12 بجے سے سہ پہر 3 بجے تک لاگو ہو گی،حکام

منگل 10 جون 2025 11:59

ریاض (اُردو پوائنٹ اخبارتازہ ترین - این این آئی۔ 10 جون2025ء)سعودی عرب میں وزارت افرادی قوت و سماجی ترقی اور قومی کونسل برائے تحفظ و پیشہ ورانہ صحت نے نجی شعبے کی تمام تنصیبات پر براہ راست دھوپ میں کام کرنے پر پابندی کا اعلان کر دیا ہے۔ میڈیارپورٹس کے مطابق یہ پابندی 15 جون سے روزانہ دوپہر 12 بجے سے سہ پہر 3 بجے تک لاگو ہو گی۔

(جاری ہے)

یہ فیصلہ کارکنوں کی صحت و سلامتی کو یقینی بنانے اور انھیں ممکنہ خطرناک موسمی اثرات سے بچانے کے لیے کیا گیا ہے، تاکہ کام کی جگہوں پر ایک محفوظ اور صحت مند ماحول فراہم کیا جا سکے جو عالمی معیار کے مطابق ہو۔

وزارت نے مالکان سے مطالبہ کیا ہے کہ وہ کام کے اوقات کی تنظیم نو کریں اور اس فیصلے کی مکمل پاسداری کریں تاکہ مختلف خطرات سے محفوظ ماحول فراہم کیا جا سکے۔ اس طرح سورج کی تیز روشنی سے پیدا ہونے والے پیشہ ورانہ امراض اور منفی اثرات کو کم سے کم کیا جا سکے گا، جس کا مثبت اثر پیداوار میں اضافے کی صورت میں ظاہر ہو گا۔مزید برآں، وزارت نے اپنی ویب سائٹ پر ایک رہنما کتابچہ جاری کیا ہے تاکہ اداروں کو ان پر عمل درآمد میں آسانی ہو اور وہ اپنے کارکنان کی حفاظت کو یقینی بنا سکیں۔