یو ٹیوبررجب بٹ دولت کی نمائش کرنے سے باز نہیں آئے، پیسوں کی بے حرمتی کرنے پر تنقید کا نشانہ بن گئے

بھانجی آیت زہرا کے عقیقے کے موقع پر منعقدہ تقریب میں پیسوں کی بے تحاشا برسات اور انہیں پیروں تلے روندنے کے مناظر نے سوشل میڈیا پر طوفان کھڑا کر دیا، عوام کی بڑی تعداد نے اسے پیسوں کی توہین اور غریبوں کے منہ پر طمانچہ قرار دیا

فیصل علوی بدھ 11 جون 2025 11:04

یو ٹیوبررجب بٹ دولت کی نمائش کرنے سے باز نہیں آئے، پیسوں کی بے حرمتی ..

لاہور(اردوپوائنٹ اخبار تازہ ترین۔11جون 2025)یو ٹیوبررجب بٹ دولت کی نمائش کرنے سے باز نہیں آئے، ایک بار پھر اپنی دولت کی نمائش پر تنقید کا نشانہ بن گئے،اپنی بھانجی آیت زہرا کے عقیقے کے موقع پر منعقدہ تقریب میں پیسوں کی بے تحاشا برسات اور انہیں پیروں تلے روندنے کے مناظر نے سوشل میڈیا پر طوفان کھڑا کر دیا،

سوشل میڈیا صارفین نے اس واقعے کو پیسوں کی بے حرمتی قرار دیتے ہوئے رجب بٹ اور ان کے خاندان کو کھل کر تنقید کا نشانہ بنایا۔

ایک صارف نے لکھا، ”اگر یہ پیسہ حلال کا ہوتا تو اس طرح اڑایا نہیں جاتا۔“ جبکہ دوسرے نے کہا، ”یہ عقیقہ نہیں بلکہ محض ایک تماشا ہے جس کے ذریعے وہ اپنی دولت کی نمائش کرنا چاہتے ہیں۔عقیقے کی تقریب کی وائرل ہونے والی ویڈیوز میں دیکھا جاسکتا ہے کہ رجب بٹ، ان کی اہلیہ ایمان اور دیگر فیملی ممبرز ننھی بچی پر پیسے برسا رہے تھے۔

(جاری ہے)

ویڈیو میں جو چیز سب سے زیادہ قابل اعتراض تھی وہ زمین پر بکھرے ہوئے نوٹوں کو پیروں تلے روندتے ہوئے مناظر۔

یہ منظر دیکھ کر صارفین غصے سے پھٹ پڑے۔عوام کی بڑی تعداد نے اسے پیسوں کی توہین اور غریبوں کے منہ پر طمانچہ قرار دیا جہاں امیر طبقات دکھاوے کیلئے کرنسی زمین پر گرا رہے ہیں اور دوسری طرف کروڑوں لوگ دو وقت کی روٹی کو ترس رہے ہیں۔یو ٹیوبر رجٹ بٹ ماضی میں بھی وہ اپنی مہنگی گاڑیوں، گھروں اور شاپنگ کی ویڈیوز کی وجہ سے بحث کا موضوع بنتے رہے ہیں۔

یاد رہے کہ اس سے قبل گزشتہ روزلاہور پولیس نے یوٹیوبر رجب بٹ اور اس کے ساتھیوں کے خلاف زیادتی اور بلیک میلنگ کا مقدمہ درج کر لیا تھا۔ مقدمہ سوشل میڈیا ایکٹوسٹ عائشہ شرافت کی درخواست پر درج کیا گیا تھا۔سوشل میڈیا پر سرگرم کارکن عائشہ شرافت کی جانب سے دی گئی درخواست پر لاہور کے تھانہ نواب ٹاون میں یہ مقدمہ درج کیا گیاتھا۔ مقدمے میں رجب بٹ، مان ڈوگر، جواد حیدر، جہانگیر بٹ اور سلمان حیدر کو نامزد کیا گیا تھا۔

ایف آئی آر میں دعویٰ کیا گیا تھاکہ سوشل میڈیا پر دوستی کے بعد عائشہ کو نشہ آور چیز پلا کر نہ صرف زیادتی کا نشانہ بنایا گیا بلکہ اس دوران نازیبا ویڈیو بھی بنائی گئی، جس کے بعد ملزمان نے اسے بلیک میل کرنا شروع کر دیاتھا۔ایف آئی آر میں الزام عائد کیا گیا تھا کہ سوشل میڈیا پر دوستی کے بعد نشہ آور چیز پلا کر زیادتی کی گئی اور نازیبا ویڈیو بنا کر بلیک میل بھی کیا گیاتھا۔پولیس حکام کا کہنا تھا کہ معاملہ انتہائی حساس نوعیت کا ہے اور اس پر مکمل قانونی کارروائی عمل میں لائی جائے گی۔ دوسری جانب یوٹیوبر رجب بٹ اور ان کے ساتھیوں کی جانب سے تاحال کوئی ردعمل سامنے نہیں آیا تھا۔