Live Updates

جوڈیشل کمیشن میں تحریک انصاف نو مئی میں ملوث ثابت ہو تو ضرور معذرت کریں گے، ترجمان پی ٹی آئی

مصالحت اور معذرت سے پہلے ثابت کریں تحریک انصاف کسی طرح نو مئی کرنے میں شامل تھی؟ وگرنہ معذرت وہ کریں جنہوں نے ہمارے ساتھ ظلم کیا ہے؛ شیخ وقاص اکرم کی گفتگو

ساجد علی اتوار 17 اگست 2025 16:06

جوڈیشل کمیشن میں تحریک انصاف نو مئی میں ملوث ثابت ہو تو ضرور معذرت کریں ..

اسلام آباد ( اُردو پوائنٹ اخبارتازہ ترین۔ 17 اگست 2025ء ) سیکریٹری اطلاعات پی ٹی آئی شیخ وقاص اکرم کا کہنا ہے کہ جوڈیشل کمیشن میں تحریک انصاف نو مئی میں ملوث ثابت ہو تو ضرور معذرت کریں گے۔ مختلف ٹی وی پروگرامز میں گفتگو کرتے ہوئے انہوں نے کہا کہ عمران خان کا مؤقف واضح ہے کہ 9 مئی کی سی سی ٹی وی فوٹیج لے آئیں اور جوڈیشل کمیشن بنا دیں، اگر ثابت ہو جائے کہ منصوبے میں تحریک انصاف ملوث تھی تو ہم ضرور معذرت کر لیں گے، مصالحت اور معذرت سے پہلے ثابت کریں کہ تحریک انصاف کسی طرح نو مئی کرنے میں شامل تھی؟ وگرنہ معذرت وہ کریں جنہوں نے ہمارے ساتھ ظلم کیا ہے۔

شیخ وقاص اکرم کا کہنا ہے کہ نو مئی کی پورے دن کی سی سی ٹی وی فوٹیج لائیں، 1، 2 سیکنڈ کی کاٹ کر فوٹیج مت دیں، اگر جوڈیشل کمیشن میں تحریک انصاف نو مئی میں ملوث ثابت ہو تو ضرور معذرت کریں گے، 26 نومبر کے بعد عمران خان نے اداروں کے خلاف بڑھتی نفرت کو دیکھ کر ہی مذاکراتی کمیٹی کا حصہ بننے کا فیصلہ کیا مگر حکومت 9 مئی اور 26 نومبر پر تحقیقاتی کمیشن سے کیوں گریزاں ہے؟۔

(جاری ہے)

خیال رہے کہ صحافی سہیل وڑائچ نے آرمی چیف فیلڈ مارشل عاصم منیر سے ملاقات کا حوالہ دیتے ہوئے لکھا تھا کہ سیاسی حوالے سے کیے گئے سوال پر فیلڈ مارشل نے کہا کہ ’سیاسی مصالحت سچے دل سے معافی مانگنے سے ممکن ہے‘، اس حوالے سے انہوں نے اسٹیج پر قرآن پاک کی آدم کی تخلیق او رشیطان کے کردار کے حوالے سے آیات کا متن اور ترجمہ سنایا جس سے واضح ہوتا تھا کہ شروع میں فرشتوں کو آدم سے مسئلہ تھا مگر خدا نے آدم کو تخلیق کیا تو سوائے ابلیس کے سب فرشتوں نے انسان کو خدا کا حکم اور کرشمہ سمجھ کر قبول کرلیاگویا معافی مانگنے والے فرشتے رہے اور معافی نہ مانگنے والا شیطان بن گیا۔