لاہور میں سپیشل بچوں کیلئے سپورٹس اپرینا تعمیر کیا جائے گا

سیکرٹری سپورٹس مظفرخان سیال کی زیرصدارت اہم اجلاس،سمر سپورٹس کیمپس ،سپورٹس سہولیات کا جائزہ

منگل 24 جون 2025 22:04

لاہور (اُردو پوائنٹ اخبارتازہ ترین - این این آئی۔ 24 جون2025ء)سیکرٹری سپورٹس پنجاب مظفرخان سیال کی زیرصدارت اہم اجلاس منعقد ہوا ۔ منگل کے روز پنجاب سٹیڈیم میں ہونے والے اجلاس میں سمر سپورٹس کیمپس اور سپورٹس سہولیات کا جائزہ لیا گیا ، اجلاس میں ڈی جی سپورٹس پنجاب خضرافضال چودھری ،ایڈیشنل سیکرٹری میاں عثمان علی ، ڈائریکٹرایڈمن ڈاکٹرمحمد کلیم اور ڈائریکٹر سپورٹس راناندیم انجم نے شرکت کی ۔

(جاری ہے)

سیکرٹری سپورٹس مظفرخان سیال نے خطاب کرتے ہوئے کہا کہ سمر سپورٹس کیمپس سے سپورٹس کلچر کو فروغ ملے گا،پنجاب کے تمام ڈویژن میں سمر سپورٹس کیمپس شروع ہونا خوش آئند ہے،سمر سپورٹس کیمپس میں افسران کھلاڑیوں کو بہترین سہولیات مہیا کریں ۔انہوں نے کہا کہ لاہور میںسپیشل بچوں کیلئے سپورٹس اپرینا تعمیر کیا جائے گا، سیالکوٹ کہوٹہ سمیت کئی شہروں میں سٹیڈیمز کے ساتھ دکانیں تیار ہوگئی ہیں،سٹیڈیمز کے ساتھ دکانوں کی تعمیر سے ڈیپارٹمنٹ کے ریونیو میں اضافہ ہوگا،46تحصیل سپورٹس افسران کے دفاتر سپورٹس سٹیڈیمز میں شفٹ کیے جائیں گے۔