باغبانوں کو باغات میں لگے نر مکھی کے جنسی پھندوں کا باقاعدگی سے معائنہ جاری رکھنے کامشورہ

منگل 8 جولائی 2025 16:10

فیصل ۱ٓباد (اُردو پوائنٹ اخبارتازہ ترین - اے پی پی۔ 08 جولائی2025ء) باغبانوں کو آم کے باغات سے گرے ہوئے خراب پھل کی روزانہ اوربروقت تلفی کو یقینی بنانے کی ہدایت کی گئی ہے اور کہاگیاہے کہ باغبان باغ میں گرے ہوئے خراب پھلوں کو اکٹھا کر کے باغ سے باہر کہیں دور گہرے گڑھے میں دبا دیں یا صاف پکی جگہ پر تیز دھوپ میں پھیلا دیں تاکہ پھل میں موجود انڈے اور سنڈیاں اپنی نشوونما پوری کر کے زمین میں داخل نہ ہو سکیں وگرنہ پھل میں موجود ہر سنڈ ی اپنی پرورش مکمل کرنے کے بعد مکھی بن کر زمین سے باہر آجائے گی اوردوبارہ پھل پر حملہ آور ہو جائے گی۔

(جاری ہے)

پلانٹ پروٹیکشن، پیسٹ وارننگ اینڈ کوالٹی کنٹرول آف پیسٹی سائیڈز محکمہ زراعت فیصل آبادکے ڈپٹی ڈائریکٹر اسرار ارشدنے باغبانوں سے کہا کہ باغبان باغوں میں لگے نر مکھی کے جنسی پھندوں کا باقاعدگی سے معائنہ جاری رکھیں اورمقررہ وقت پر میتھائل یوجینال کے کیپسول کی تبدیلی کو یقینی بنائیں۔ انہوں نے کہا کہ پھل کی مکھی کی وجہ سے آم کی برآمد کو مسائل درپیش ہیں لہٰذا پھل کی مکھی کے تدارک اور آم کے پھل کی برآمد میں اضافہ کیلئے باغبان مربوط طریقہ انسداد اپنائیں جس سے نہ صرف ان کی آمدن میں اضافہ ہو گا بلکہ برآمد میں اضافہ سے ملکی ترقی و خوشحالی کا خواب بھی شرمندہ تعبیر ہوسکے گا۔