ڈینگی سمیت مچھروں سے پھیلنے والی چار بیماریوں سے بچاؤ کی ہدایات جاری

یو این جمعہ 11 جولائی 2025 22:15

اسلام آباد (اُردو پوائنٹ ۔ UN اردو۔ 11 جولائی 2025ء) عالمی ادارہ صحت (ڈبلیو ایچ او) نے ڈینگی، چکن گونیا، زکا اور زرد بخار جیسی بیماریوں کے مصدقہ و مشتبہ مریضوں کی دیکھ بھال کرنے والے طبی کارکنوں کے لیے نئی رہنمائی جاری کی ہے جس سے انہیں بیماری کا پھیلاؤ روکنے اور مریضوں کو موت سے بچانے کے لیے بہترین نگہداشت مہیا کرنے میں مدد ملے گی۔

یہ چاروں بیماریاں ایڈیس مچھروں سے پھیلتی ہیں۔

کبھی انہیں گرم اور نیم گرم خطوں کے امراض ہی سمجھا جاتا تھا۔ لیکن موسمیاتی تبدیلی، بڑھتی آبادی، سفر اور شہروں کی جانب نقل مکانی کے نتیجے میں اب یہ نئے علاقوں میں بھی پھیلنے لگی ہیں اور صحت عامہ کے لیے بڑا خطرہ بنتی جا رہی ہیں جن سے 5.6 ارب لوگوں کو خطرہ ہے۔

ادارے کی جاری کردہ ان ہدایات میں ایسی سفارشات بھی شامل ہیں جن کے ذریعے طبی عملے کو سنگین اور غیرسنگین درجے کے امراض میں مبتلا ایسے مریضوں کی بہتر نگہداشت میں مدد ملے گی جنہیں ہسپتالوں میں علاج معالجے کی ضرورت پڑتی ہے۔

(جاری ہے)

یہ رہنمائی طبی نظام میں ہر سطح پر لاگو کی جا سکتی ہے جس میں مقامی طور پر مریضوں کی نگہداشت، بنیادی طبی نگہداشت اور ہسپتالوں کے ہنگامی شعبہ جات اور وارڈ بھی شامل ہیں۔

ڈینگی، چکن گونیا، زکا اور زرد بخار کی تشخیص کرنا آسان نہیں ہوتا کیونکہ ان کی علامات ملی جلی ہوتی ہیں اور ان پر دیگر بیماریوں کا گمان بھی ہوتا ہے۔ بعض علاقوں میں یہ بیماریاں پھیلانے والے وائرس بیک وقت فعال ہوتے ہیں جس کے باعث ایسی جگہوں پر ان کی درست تشخیص اور بھی مشکل ہو جاتی ہے جہاں طبی معائنے کی جدید سہولیات محدود ہوں۔

'ڈبلیو ایچ او' نے کہا ہے کہ ان امراض کا پھیلاؤ بڑھ رہا ہے اور یہ نئے خطوں کا رخ کر رہے ہیں۔ ان حالات میں جدید ترین طریقوں اور حقائق کی بنیاد پر رہنمائی کے تحت ان بیماریوں کو پہچاننا اور ان کا علاج کرنا ضروری ہے۔

یہ پہلا موقع ہے جب 'ڈبلیو ایچ او' نے ان چاروں بیماریوں کے حوالے سے مشترکہ عالمگیر رہنمائی جاری کی ہے۔