ڈبلیو ڈبلیو ای کے معروف لیجنڈ ریسلر ریٹائر

اٹلانٹا (اُردو پوائنٹ اخبارتازہ ترین - این این آئی۔ 13 جولائی2025ء)ڈبلیو ڈبلیو ای کے معروف اور لیجنڈ ریسلر بل گولڈ برگ لگ بھگ 3 دہائیوں طویل کیرئیر کے بعد ریٹائر ہوگئے ہیں۔بل گولڈ برگ 12 جولائی کو آخری میچ میں ڈبلیو ڈبلیو ای کے ورلڈ ہیوی ویٹ چیمپئن گنٹھر کے مدمقابل آئے تھے۔سنیچر نائٹ مین ایونٹ کا انعقاد بل گولڈ برگ کے آبائی شہر اٹلانٹا میں ہوا۔

اپنے آخری ریسلنگ مقابلے کے لیے بل گولڈ برگ اپنے دوستوں کے ساتھ رنگ میں آئے جبکہ کچھ دوست شائقین میں موجود تھے۔ورلڈ ہیوی ویٹ چیمپئن شپ کے لیے ہونے والا یہ مقابلہ گنٹھر نے اپنے نام کیا۔بل گولڈ برگ نے اپنے مخصوص داؤ Spear اور جیک ہیمر کا استعمال بھی کیا مگر دفاعی چیمپئن کو ہرانے میں ناکام رہے۔58 سالہ بل گولڈ برگ کو گنٹھر نے سلیپر submission داؤ کے ذریعے ہرانے میں کامیابی حاصل کی۔

(جاری ہے)

14 منٹ طویل میچ کے بعد بل گولڈ برگ کے خاندان اور دوست رنگ میں جمع ہوئے اور ریسلر نے الوداعی خطاب کیا۔یہ خطاب ڈبلیو ڈبلیو ای کی جانب سے لائیو نشر تو نہیں کیا گیا مگر ایکس (ٹوئٹر) پر ضرور اس کی وڈیو جاری کی گئی۔بل گولڈ برگ نے اپنے ریسلنگ کیرئیر کا آغاز 22 ستمبر 1997 میں ڈبلیو سی ڈبلیو سے کیا تھا اور مسلسل 173 میچوں تک ناقابل شکست رہے جس دوران انہوں نے ڈبلیو سی ڈبلیو چیمپئن شپ بھی جیتی۔

27 دسمبر 1998 کو کیون نیش کے ہاتھوں انہیں پہلی شکست کا سامنا ہوا۔ڈبلیو سی ڈبلیو کے بعد کچھ عرصے تک وہ آل جاپان ریسلنگ پرو کا حصہ رہے اور 2003 میں ڈبلیو ڈبلیو ای کا حصہ بنے جہاں وہ لگ بھگ ایک سال تک سرگرم رہے جس دوران انہوں نے ایک بار ورلڈ ہیوی ویٹ چیمپئن شپ بھی جیتی۔2004 کے بعد وہ ریسلنگ کی دنیا سے دور ہوگئے اور جون 2015 میں دی لیجنڈز آف ریسلنگ شو کے ذریعے ایک بار پھر واپسی کی۔

2016 میں وہ ایک بار پھر ڈبلیو ڈبلیو ای میں واپس آئے اور بروک لیسنر کو ایک منٹ 26 سیکنڈز میں شکست دی۔بعد ازاں 2017 کے فاسٹ لین ایونٹ میں وہ ڈبلیو ڈبلیو ای یونیورسل چیمپئن بنے اور یہ چیمپئن شپ ایک ماہ بعد بروک لیسنر نے انہیں شکست دیکر اپنے نام کرلی۔اس کے بعد بھی بل گولڈ برگ وقفے وقفے سے ڈبلیو ڈبلیو ای میں واپس آتے رہے اور ایک بار مزید ڈبلیو ڈبلیو ای یونیورسل چیمپئن شپ بھی جیتی۔