اے ایم آئی سمارٹ میٹرز کی تنصیب ،لیسکو مقررہ ہدف حاصل کرنے میں ناکام

وفاقی حکومت کے فنانس ڈویژن نے کمپنی کی ناقص منصوبہ بندی پر مبنی رپورٹ جاری کر دی

پیر 14 جولائی 2025 16:42

لاہور (اُردو پوائنٹ اخبارتازہ ترین - این این آئی۔ 14 جولائی2025ء) لاہور الیکٹرک سپلائی کمپنی (لیسکو )جدید ٹیکنالوجی سے مزین اے ایم آئی سمارٹ میٹرز کی تنصیب کے مقررہ اہداف حاصل کرنے میں ناکام ہو گئی جس پر وفاقی حکومت کے فنانس ڈویژن نے کمپنی کی ناقص منصوبہ بندی پر مبنی رپورٹ جاری کر دی۔تفصیلات کے مطابق لیسکو جدید ٹیکنالوجی سے مزین اے ایم آئی میٹرز لگانے کے مقررہ اہداف حاصل نہیں کرسکی،مقررہ اہداف کا حصول نہ ہونے سے لائن لاسز اور آپریشنل معاملات شدید متاثر ہوئے ہیں۔

وفاقی حکومت کے فنانس ڈویژن نے لیسکو سمیت دیگر اداروں کی گزشتہ مالی سال کے پہلے چھ ماہ کی رپورٹ جاری کر دی ہے جس میں کہاگیاہے کہ لیسکو کی ناقص حکمت عملی کی وجہ سے ریونیو کے اہداف بھی حاصل نہیں ہو سکے۔

(جاری ہے)

رپورٹ کے مطابق وفاقی حکومت نے اووربلنگ اور بجلی چوری کی روک تھام کے لئے اے ایم آئی پراجیکٹ شروع کیاتھالیکن ایڈوانسڈ میٹرنگ انفراسٹرکچر پلان کے تحت میٹرز کی تنصیب کو یقینی نہیں بنایا جا سکا۔گزشتہ ماہ سے صنعتی صارفین کے لئے اے ایم آئی سمارٹ میٹرز لگانا شروع کر دیئے گئے ہیں،لیسکو میں تھری فیز اور ایل ٹی میٹرز کی وجہ سے اے ایم آئی میٹرز نصب ہوں گے،ان اے ایم آئی میٹرز کی تنصیب سے اووربلنگ اور بجلی چوری کی روک تھام میں مدد ملے گی۔