ویتنام میں خراب موسم کے باعث کشتی الٹنے سے 34 سیاح ہلاک، متعدد لاپتا

اتوار 20 جولائی 2025 10:30

ہنوئی (اُردو پوائنٹ اخبارتازہ ترین - اے پی پی۔ 20 جولائی2025ء) ویتنام میں سیاحوں کی کشتی الٹنے کے نتیجے میں کم از کم 34 افراد ہلاک جبکہ متعدد لاپتا ہو گئے ہیں۔ بی بی سی کے مطابق یہ حادثہ شمالی ویتنام کے مشہور سیاحتی مقام ہا لانگ بے میں خراب موسم کے باعث پیش آیا۔مرنے والوں میں بیشتر ویتنامی شہری ہیں جو دارالحکومت ہنوئی سے سیاحت کی غرض سے آئے تھے۔

(جاری ہے)

امدادی کارکنوں کا کہنا ہے کہ حادثے میں بچ جانے والوں کی تلاش میں شدید بارشوں کے باعث مشکلات کا سامنا ہے۔ریسکیوآپریشن میں اب تک 11 افراد کو پانی سے زندہ نکالا جا چکا ہے۔ویتنامی بارڈر گارڈز اور بحریہ کا کہنا ہے کہ حادثے کا شکار ہونے والی ونڈر سیز نامی کشتی پر 53 افراد سوار تھے ۔ زندہ نکالے جانے والوں میں ایک دس سالہ بچہ بھی شامل ہے جو الٹنے والی کشتی کے نیچے بننے والے ایک ایئر پاکٹ میں پھنس گیا تھا۔ مقامی ذرائع ابلاغ کے مطابق اب تک کم از کم 8 بچوں کی لاشیں نکالی جا چکی ہیں۔ویتنامی حکومت نے حادثے کی وجوہات جاننے کے لئے تحقیقات کا اعلان کیا ہے۔