اسرائیل کا فلسطینیوں کو غزہ سے نکالنے کے لیے امریکہ سے مدد کا مطالبہ

موساد کے ڈائریکٹر نے رواں ہفتے واشنگٹن کا دورہ کیا،دو باخبر ذرائع کی گفتگو

اتوار 20 جولائی 2025 10:55

تل ابیب (اُردو پوائنٹ اخبارتازہ ترین - این این آئی۔ 20 جولائی2025ء)اسرائیلی خفیہ ادارے موساد کے سربراہ ڈیوڈ برنیع نے اس ہفتے واشنگٹن کا دورہ کیا تاکہ امریکہ سے مدد حاصل کی جا سکے۔ اس کا مقصد بعض ممالک کو اس بات پر قائل کرنا ہے کہ وہ غزہ سے لاکھوں فلسطینیوں کو نکال کر اپنے ہاں آباد کریں۔ یہ بات انگریزی خبر رساں ویب سائٹ نے دو با خبر ذرائع کے حوالے سے بتائی۔

(جاری ہے)

رپورٹ کے مطابق، برنیع نے امریکی صدر کے مشرق وسطی کے لیے خصوصی ایلچی اسٹیو ویٹکوف کو بتایا کہ اسرائیل نے ایتھوپیا، انڈونیشیا اور لیبیا کے ساتھ اس حوالے سے بات چیت کی ہے۔ذرائع کا کہنا تھا کہ ملاقات کے دوران برنیع نے ویٹکوف سے کہا کہ ایتھوپیا، انڈونیشیا اور لیبیا نے غزہ سے بڑی تعداد میں فلسطینیوں کو قبول کرنے کے لیے آمادگی ظاہر کی ہے۔ اسرائیلی تجویز ہے کہ واشنگٹن ان ممالک کو ترغیبات دے اور اسرائیل کی مدد کرے تاکہ وہ ان کو قائل کر سکے۔تاہم ذرائع میں سے ایک کے مطابق، ویٹکوف نے اس تجویز پر کوئی وعدہ نہیں کیا، اور یہ واضح نہیں ہے کہ امریکہ اس معاملے میں کسی عملی کردار کا ارادہ رکھتا ہے یا نہیں۔