منی لانڈرنگ کیس،پرویز الٰہی کیخلاف سماعت کا تحریری حکم جاری ، تفتیشی افسر معطل

پیر 21 جولائی 2025 16:54

لاہور (اُردو پوائنٹ اخبارتازہ ترین - این این آئی۔ 21 جولائی2025ء) سپیشل سینٹرل عدالت لاہور نے سابق وزیر اعلیٰ پنجاب چودھری پرویز الٰہی سمیت دیگر کے خلاف منی لانڈرنگ کیس میں تحریری حکم جاری کر دیا۔دو صفحات پر مشتمل یہ حکم سپیشل سینٹرل عدالت کے جج محمد عارف خان نیازی نے جاری کی۔

(جاری ہے)

تحریری حکم کے مطابق ایف آئی اے نے عدالت کو بتایا کہ پرویز الیہی کے تفتیشی افسر کو کسی دوسری انکوائری میں معطل کر دیا گیا ہے، اسسٹنٹ ڈائریکٹر ایف آئی اے نے کہا کہ چالان کمیٹی کی منظوری کے بعد جمع کرایا جائے گا، تاہم عبوری حکم میں عدالت نے ہدایت کی ہے کہ آئندہ سماعت تک چالان ہر صورت جمع کرایا جائے۔

پرویز الٰہی کی حاضری معافی پر شکایت کنندہ کے وکیل نے اعتراض اٹھایا کہ یہ تاخیری حربے ہیں، عدالت کو بتایا گیا کہ گزشتہ سماعت پر بھی اسی نوعیت کی میڈیکل رپورٹ پیش کی گئی تھی، جس میں دس روز کے بیڈ ریسٹ کا مشورہ تھا اور آج بھی وہی مشورہ پیش کیا گیا۔شکایت کنندہ نے اس بات پر بھی اظہارِ افسوس کیا کہ تاحال کیس کا ٹرائل شروع نہیں ہو سکا۔عدالت نے اعتراضات کے باوجود پرویز الٰہی کی ایک روزہ حاضری معافی منظور کرتے ہوئے کیس کی مزید سماعت 18اگست تک ملتوی کر دی۔