خیبر فیسٹیول 2025رنگارنگ تقریب کیساتھ اختتا م پذیر

فیسٹیول میں بیڈمنٹن،باسکٹ بال،رسی کشی،تیر اندازی،مارشل آرٹس، جمناسٹک ،پی ٹی شو سمیت کھانے پینے اور ہنر مند خواتین و نوجوانوں کے ثقافتی سٹالز بھی سجائے گئے

پیر 21 جولائی 2025 20:23

پشاور(اُردو پوائنٹ اخبارتازہ ترین - این این آئی۔ 21 جولائی2025ء)خیبرپختونخوا کلچر اینڈ ٹورازم اتھارٹی اور ضلعی سپورٹس آفس خیبرکے باہمی اشتراک سے جمرود سپورٹس کمپلیکس میںمنعقدہ خیبر فیسٹیول رنگارنگ تقریب کیساتھ اختتام پذیرہوگیا۔ اختتامی تقریب کے موقع پر ڈائریکٹرجنرل سپورٹس تاشفین حیدرمہمان خصوصی تھے ۔ جنہوں نے فاتح کھلاڑیوں میں انعامات تقسیم کئے ۔

ان کے ہمراہ پراجیکٹ ڈائریکٹر ٹورازم اتھارٹی خیبرپختونخوا اشتیاق خان،اسسٹنٹ کمشنر جمرود فہد ضیاء، ایڈیشنل اسسٹنٹ کمشنر نسیم علی شاہ، ڈسٹرکٹ سپورٹس آفیسر محمد حسین، ضلعی افسران، صحافی، کھلاڑی اور اہل علاقہ کی کثیر تعداد نے شرکت کی۔فیسٹیول میں نوجوانوں اور بچوں کیلئے مختلف کھیلوں کے مقابلوں کا بھی انعقاد کیا گیا جن میںبیڈمنٹن،باسکٹ بال،رسی کشی،تیر اندازی،مارشل آرٹس، جمناسٹک اور پی ٹی شوشامل تھے۔

(جاری ہے)

فیسٹیول میں مختلف اقسام کے فوڈ سٹالز اور ہنر مند خواتین و نوجوانوں کے ثقافتی سٹالز بھی سجائے گئے تھے جہاں پر مقامی پکوان، دستکاریاں، روایتی ملبوسات اور فنونِ لطیفہ کی اشیاء رکھی گئیں۔ فیسٹیول کی خاص بات‘‘ثقافتی شام’’تھی جس میں پشتو کے مشہور گلوکاروں نے اپنے فن کا شاندار مظاہرہ کیا۔اسی موقع پر معروف مزاحیہ فنکار سید رحمان شینو اور ان کے ٹیم نے سماجی شعور اجاگر کرنے کیلئے‘‘حق’’کے عنوان سے ایک دلچسپ اور معنی خیز اسٹیج ڈرامہ پیش کیا۔