کمشنر سبی ڈویژن اسداللہ فیض کا ڈویژنل ہیڈکوارٹر ہسپتال سبی کا تفصیلی دورہ

منگل 22 جولائی 2025 23:40

کوئٹہ (اُردو پوائنٹ اخبارتازہ ترین - اے پی پی۔ 22 جولائی2025ء) کمشنر سبی ڈویژن اسداللہ فیض نے ڈویژنل ہیڈکوارٹر ہسپتال سبی کا تفصیلی دورہ کیا۔ اس موقع پر ڈویژنل ڈائریکٹر صحت عبدالخالق اور میڈیکل سپرنٹنڈنٹ ڈاکٹر عمیر حسین بھی ان کے ہمراہ تھے۔دورے کے دوران کمشنر نے مختلف وارڈز، ایمرجنسی، لیبارٹری اور دیگر شعبہ جات کا معائنہ کیا اور مریضوں کو فراہم کی جانے والی طبی سہولیات کا جائزہ لیا۔

ایم ایس ڈی ایچ کیو نے ہسپتال کی موجودہ صورتحال اور درپیش چیلنجز پر تفصیلی بریفنگ دی۔

(جاری ہے)

کمشنر اسداللہ فیض نے ہسپتال کے عملے کی کارکردگی کو سراہتے ہوئے کہا کہ محدود وسائل کے باوجود عملہ قابل تحسین خدمات سرانجام دے رہا ہے۔ انہوں نے ہسپتال میں موجود مسائل پر تشویش کا اظہار کرتے ہوئے کہا کہ تمام اہم امور کو فوری طور پر سیکرٹری صحت کے نوٹس میں لایا جائے گا۔انہوں نے کہا کہ ہسپتال کو ایکسپریس فیڈر کے ذریعے 24 گھنٹے بجلی کی بلا تعطل فراہمی، ڈینٹل یونٹ کا قیام، ادویات کی دستیابی، ڈاکٹروں کی تعیناتی کی منظوری اور بلڈ بینک کی فراہمی جیسے اہم معاملات کو ترجیحی بنیادوں پر حل کیا جائے گا۔