ججز نے انصاف کی فراہمی کو شفاف بنانے کا حلف لے رکھا ہے‘ چیف جسٹس سندھ ہائیکورٹ

جمعرات 24 جولائی 2025 13:08

لاڑکانہ(اُردو پوائنٹ اخبارتازہ ترین - این این آئی۔ 24 جولائی2025ء) چیف جسٹس سندھ ہائی کورٹ جسٹس محمد جنید غفار نے کہا کہ ججز نے حلف لیا ہے کہ انصاف کی فراہمی کو شفاف بنایا جائے گا، تمام قانونی تقاضوں کو پورا کیا جارہا ہے۔چیف جسٹس سندھ ہائی کورٹ جسٹس محمد جنید غفار نے ہائی کورٹ بار کے عشائیہ سے خطاب کرتے ہوئے کہا کہ شکر گزار ہوں ہائی کورٹ بار ایسوسی ایشن کا جنہوں نے سب سے پہلے مجھے لاڑکانہ مدعو کیا، ہماری کوشش ہوتی ہے کہ انصاف کی فراہمی کو بروقت بنایا جائے۔

چیف جسٹس نے کہا کہ قانونی تقاضوں کو پورا کرنے میں تھوڑی تاخیر ہوجاتی ہے، سکھر پینچ میں ویڈیو لنک مہیا کرنے پر بھی کام کر رہے ہیں، ای کورٹس کے لئے ایک پائلٹ پراجیکٹ چل رہا ہے، اگر مثبت نتائج آئے تو تمام سیشن اور سرکٹ کورٹس کو بھی مہیا کردیں گے تاکہ کیسز میں تاخیر نہ ہو۔

(جاری ہے)

چیف جسٹس محمد جنید غفار کا مزید کہنا تھا کہ وکلاء سے بھی گزارش ہے کے کیسز میں پوری تیاری سے آئیں تاکہ کیسز کا فیصلہ بروقت کیا جاسکے، نیشنل جوڈیشل پالیسی میکنگ کمیٹی نے ماڈل کورٹس کو بھی روئیو کرنے پر غور کر رہی ہے۔

انہوں نے مزید کہا کہ کیس داخل کرنے پر ججز وکلاء کی ساکھ کو بھی دیکھتے ہوئے درخواست کو منظور یا نہ منظور کرتے ہیں، وکلاء سے گزارش ہے کہ آپ بھی اپنی ساکھ کو بہتر رکھیں کیونکہ آپ کی مدد سے قانونی تقاضے مکمل ہوتے ہیں۔