محکمہ لائیو سٹاک کی جانب سے مون سون و سیلاب میں مویشیوں، جانور وں اور پرندوں کوبیماریوں سے محفوظ رکھنے کیلئے حفاظتی ٹیکے لگانے کا عمل مزید تیز کردیا گیا

جمعرات 24 جولائی 2025 17:30

فیصل ۱ٓباد (اُردو پوائنٹ اخبارتازہ ترین - اے پی پی۔ 24 جولائی2025ء) محکمہ لائیو سٹاک و ڈیری ڈویلپمنٹ فیصل آباد ڈویژن کی جانب سے مون سون کی بارشوں اور سیلابی صورتحال کے باعث مویشیوں کوموسمیاتی و متعدی امراض، گل گھوٹو، منہ کھر،نمونیا، انتڑیوں کے زہر، مرغیوں کو رانی کھیت کے ٹیکے لگانے کا عمل مزید تیز کردیا گیاہے جبکہ ویکسی نیشن مہم 30 ستمبر تک جاری رکھنے کا بھی فیصلہ کیا گیاہے تاکہ مویشی، جانور، پرندے ہر قسم کی موسمی بیماریوں سے محفوظ رکھے جاسکیں۔

محکمہ لائیو سٹاک وڈیری ڈویلپمنٹ فیصل آباد ڈویژن کے ڈائریکٹر ڈاکٹرسید ندیم بدرنے بتایاکہ مذکورہ مہم کے دوران جانوروں، مویشیوں، پرندوں کو حفاظتی ٹیکے لگانے کا ہدف مکمل کیاجائیگا۔ انہوں نے بتایاکہ تمام مویشی پال حضرات، لائیو سٹاک فارمرز اور پولٹری فارمرز کو ہدایت کی گئی ہے کہ وہ موسم برسات کے دوران اپنے جانوروں اور پرندوں کو موسمی بیماریوں سے بچانے کیلئے حفاظتی ٹیکے لگوائیں تاکہ بعدازاں انہیں کسی پریشانی کا سامنا نہ کرناپڑے۔

(جاری ہے)

انہوں نے ملک میں گوشت اور اون کی بڑھتی ہوئی طلب کے باعث لائیو سٹاک فارمرز اور دیہاتیوں و کسانوں کو ہدایت کی کہ وہ زیادہ گوشت اور اچھی اون کیلئے بھیڑوں کی علاقائی نسلیں پالنے کو ترجیح دیں اور اس سلسلہ میں محکمہ لائیو سٹاک کے فیلڈ سٹاف کی مشاورت کو بھی یقینی بنایا جائے تاکہ وہ زیادہ سے زیادہ مالی فائدہ حاصل کر سکیں۔ انہوں نے لائیو سٹاک فارمرز کو ہدایت کی کہ بھیڑوں کے باڑے کو سطح زمین سے 2فٹ اونچا رکھا جائے، بھیڑوں کو کرم کش ادویات ہر 4ماہ بعد پلوائی جائیں اور اون کی کترائی موسم بہار اور موسم خزاں میں سال میں 2بار کروائی جائے۔

ا نہوں نے کہا کہ بھیڑوں بکریوں کو بیماریوں سے محفوظ رکھنے کیلئے محکمہ کی ہدایات کے مطابق حفاظتی ٹیکے لگوائیں جائیں اور حاملہ بھیڑوں کو آخری ماہ میں ریوڑ سے الگ کر کے انہیں زود ہضم غذا کی فراہمی کو بھی اولین ترجیح دی جائے۔