اداروں کیخلاف متنازع ٹوئٹ‘ اعظم سواتی پر فرد جرم کی کارروائی مؤخر

میری ہمیشہ سے کوشش رہی ہے کہ ہم عدلیہ کو مضبوط کریں‘ افسوس ہے کہ ہم آپ کے ہاتھ مضبوط نہیں کرسکے‘بیان

ہفتہ 26 جولائی 2025 14:39

اداروں کیخلاف متنازع ٹوئٹ‘ اعظم سواتی پر فرد جرم کی کارروائی مؤخر

اسلام آباد(اُردو پوائنٹ اخبارتازہ ترین - این این آئی۔ 26 جولائی2025ء)اداروں کے خلاف متنازع ٹوئٹ کے کیسز میں اعظم سواتی پر فرد جرم کی کارروائی مؤخر ہوگئی۔ ڈسٹرکٹ اینڈ سیشن کورٹس اسلام آباد میں قومی سلامتی کے اداروں کے خلاف متنازع ٹویٹ کیسز پر سینیٹر اعظم سواتی پر 2 مقدمات میں فرد جرم کی کارروائی مؤخر ہو گئی۔ایڈیشنل ڈسٹرکٹ اینڈ سیشن جج افضل مجوکہ کے روبرو سماعت کے دوران اعظم سواتی کی بریت کی درخواست پر دلائل نہیں ہوسکے۔

(جاری ہے)

اس موقع پر اعظم سواتی نے کہا کہ میں عدالت میں کچھ بتانا چاہتا ہوں، میں 2003 سے سینیٹ میں ہوں،میری ہمیشہ سے کوشش رہی ہے کہ ہم عدلیہ کو مضبوط کریں،مجھے افسوس ہے کہ ہم آپ کے ہاتھ مضبوط نہیں کرسکے۔عدالت نے اعظم سواتی کے وکلا کو اگلی سماعت پر بریت کی درخواست پر دلائل دینے کی ہدایت کرتے ہوئے کیس کی سماعت 20 ستمبر تک ملتوی کردی۔ سماعت کے موقع پر پی ٹی آئی رہنما اعظم سواتی اپنے وکلا مرتضی طوری اور سہیل سواتی کے ہمراہ عدالت میں پیش ہوئے۔واضح رہے کہ اعظم سواتی کے خلاف پیکا ایکٹ کے تحت 2 مقدمات درج ہیں۔