ڈپٹی کمشنرسرگودھا کا ڈاکٹرفیصل مسعود ٹیچنگ ہسپتال کا دورہ، ’’رحمت اللعالمین بلاک‘‘ کا معائنہ، سہولیات، شفٹنگ اور انتظامات کا جائزہ لیا

جمعرات 31 جولائی 2025 15:50

سرگودھا (اُردو پوائنٹ اخبارتازہ ترین - اے پی پی۔ 31 جولائی2025ء) ڈپٹی کمشنر سرگودھا کیپٹن ریٹائرڈ محمد وسیم نے گورنمنٹ ڈاکٹر فیصل مسعود ٹیچنگ ہسپتال کا تفصیلی دورہ کیا۔ انہوں نے حال ہی میں مکمل ہونے والے ’’رحمت اللعالمین بلاک‘‘ کا معائنہ کیا اور اولڈ بلاک سے مریضوں، سٹاف اور مختلف وارڈز کی مرحلہ وار منتقلی کے عمل کا جائزہ لیا۔ ڈپٹی کمشنر نے نیو بلاک میں قائم ایمرجنسی، میڈیکل، سرجیکل، گائنی، لیبارٹری، فارمیسی اور وارڈز کا معائنہ کیا۔

انہوں نے مریضوں سے براہ راست ملاقات کر کے فراہم کردہ سہولیات، علاج معالجے کے معیار، صفائی اور سٹاف کے رویے کے بارے میں دریافت کیا۔ مریضوں اور تیمارداروں نے نئی عمارت، بہتر سہولیات اور ماحول پر اطمینان کا اظہار کیا۔

(جاری ہے)

ڈپٹی کمشنر نے ہسپتال انتظامیہ کو ہدایت کی کہ نئے بلاک میں شفٹنگ کے عمل کو جلد از جلد مکمل کیا جائے اور یہ امر یقینی بنایا جائے کہ مریضوں کو کسی قسم کی دشواری یا تاخیر کا سامنا نہ ہو۔

انہوں نے اس موقع پر کہا کہ عوام کو صحت کی معیاری سہولیات کی فراہمی حکومت پنجاب کی اولین ترجیح ہے اور اس سلسلے میں ہسپتالوں کی بہتری کے لیے بھرپور وسائل فراہم کیے جا رہے ہیں۔ایم ایس ڈاکٹر سہیل طارق نے ڈپٹی کمشنر کو بریفنگ دیتے ہوئے بتایا کہ ’’رحمت اللعالمین بلاک‘‘ میں جدید مشینری، ایئر کنڈیشنڈ وارڈز، وافر بیڈز، طبی آلات اور تربیت یافتہ سٹاف کی فراہمی یقینی بنائی گئی ہے۔

انہوں نے کہا کہ اس بلاک کے فعال ہونے سے ہسپتال پر مریضوں کا دبائو کم ہو گا اور علاج معالجے کا معیار مزید بہتر ہو گا۔ ڈپٹی کمشنر نے ہسپتال کے مختلف حصوں میں صفائی، طبی فضلہ تلفی کے نظام، واٹر کولرز، ٹوائلٹس اور سکیورٹی کی صورتحال کا بھی معائنہ کیا اور بہتری کے لیے ضروری ہدایات جاری کیں۔ انہوں نے کہا کہ ضلعی انتظامیہ شہریوں کو صحت کی بنیادی سہولیات کی فراہمی میں کوئی کسر نہیں چھوڑے گی اور اس حوالے سے ہسپتال انتظامیہ کی کارکردگی کی مسلسل مانیٹرنگ کی جائے گی۔