بورڈ آف انٹرمیڈیٹ اینڈ سیکنڈری ایجوکیشن ڈیرہ اسماعیل خان کے میٹرک امتحانات کے نتائج کا اعلان

ڈیرہ اسماعیل خان (اُردو پوائنٹ اخبارتازہ ترین - این این آئی۔ 31 جولائی2025ء)بورڈ آف انٹرمیڈیٹ اینڈ سیکنڈری ایجوکیشن ڈیرہ اسماعیل خان کے میٹرک 2025 کے سالانہ امتحانات کے نتائج کا اعلان ایک مقامی ہال میں کیا گیا جس کے مہمان خصوصی تحصیل میئر سردارعمر امین خان گنڈہ پور تھے۔ جبکہ اس تقریب کی صدارت چیئرمین ڈیرہ بورڈ ڈاکٹر احسان اللہ نے کی۔اس موقع پر سردار عمر خان نے تقریب سے خطاب کرتے ہوئے کہا کہ میٹرک کے نتائج بہت اہم ہوتے ہیں کیونکہ یہ طلبا کے مستقبل پر اثرانداز ہوتے ہیں۔

انھوں نے کہا کہ تحریک انصاف حکومت کی اولین ترجیح بانی چیئرمین کے ویژن کے مطابق تعلیم ہی ہے۔ انھوں نے کہا کہ اس وقت صوبہ خیبرپختونخوا میں سب سے زیادہ بجٹ تعلیم کے لئے مختص کیا ہوا ہے کیونکہ یہ ہمارے نوجوان نسل کے مستقبل کے لئے ضروری ہے۔

(جاری ہے)

انھوں نے کہا کہ آج ڈیرہ وال بورڈ کا ڈیرہ وال انتظامیہ کے ساتھ مل کر ہم اپنے پوزیشن ہولڈر طلبا و طالبات کومبارکباد بھی دیتے ہیں اور ان کے بہتر مستقبل کے لئے دعاگو ہیں ۔

انھوں نے کہا کہ ڈیرہ بورڈ نے جس طرح گزشتہ ڈیڑھ سال سے میرٹ کی بالادستی، شفافیت اور ایمانداری سے نتائج تیار کئے ہیں یہ ہماری حکومت کے انصاف پر مبنی سلوگن پر مہر ثبت کرنے کے مترادف ہے۔انھوں نے کہا کہ بورڈ انتظامیہ کی انہی کوششوں سے طلبا، والدین، اساتذہ کرام اور کمیونٹی کے اعتماد میں اضافہ ہوا ۔ اس موقع پر چیئرمین بورڈ ڈاکٹر احسان اللہ نے خطاب کرتے ہوئے کہا کہ اس وقت ڈیرہ بورڈ ملک بھر میں واحد بورڈ کے طور پر سامنے آرہا ہے جہاں وزیراعلی سردار علی امین خان گنڈہ پور کی کاوشوں سے سو کنال اراضی بورڈ کے لئے مختص کردی گئی ہے جس میں یوتھ ہاسٹل اور سپورٹس کمپلیکس بھی بنائے جائیں گے جبکہ پورے بورڈ کو ڈیجٹلائزڈ کردیا گیا ہے اور انشا اللہ بورڈ کی تاریخ میں پہلی بار 2026 میں آن لائن سکریننگ اسیسمنٹ ہوگی جبکہ جوبچہ جس جگہ پر موجود ہے وہیں سے وہ بورڈ فیس اور دیگر دستاویزات آن لائن ڈیرہ بورڈ کو بھیج سکے گا۔

کنٹرولر امتحانات ڈیرہ بورڈ ڈاکٹر قیصر انور نے 2025 میٹرک سالانہ امتحانات کے نتائج کا اعلان کرتے ہوئے کہا کہ معاشرے کی ترقی میں اداروں کا کردار بہت اہم ہوتا ہے۔ کیونکہ یہ ادارے ہماری امیدوں کا مرکز ہوتے ہیں اور یہ امیدیں ہمارے اعتماد کو بحال کرتی ہیں اس لئے اس بات کا خاص خیال رکھا گیا ہے کہ طلبا کی محنت کا ثمر ان کو ملے۔ انھوں نے کہا کہ بحیثیت کنٹرولر پیپر مارکنگ سے لے کر رزلٹ تک کے تمام مراحل میں مشکلات کا سامنا کرنا پڑا لیکن جب سردار علی امین خان گنڈہ پور کے جاری پروگرام میں یہ بلڈنگ بن جائے گی تو یہ تمام امور بہتر انداز میں پایہ تکمیل تک پہنچائے جاسکیں گے۔

اس کے بعد ڈاکٹر قیصر انور نے میٹرک نتائج کی تفصیل بتاتے کہا دسویں میں ٹوٹل 23 ہزار 8 سو 45 امیدواروں نے حصہ لیا جن میں 21 ہزار 5 سو 25 امیدوار کامیاب قرار پائے کامیابی کا تناسب 90.27 فیصد رہا،سائنس گروپ میں ٹوٹل 17 ہزار 2 سو 86 امیدواروں نے حصہ لیا جن میں 16 ہزار 1 سو 54 کامیاب قرار پائے کامیابی کا تناسب 93.45 فیصد رہا،جبکہ آرٹس گروپ میں ٹوٹل 6 ہزار 5 سو 59 امیدواروں نے حصہ لیا جن میں 5 ہزار 3 سو 71 امیدوار کامیاب قرار پائے کامیابی کا تناسب 81.89 فیصد رہا،اسی طرح نہم میں ٹوٹل 25 ہزار 7 سو 1 امیدواروں نے حصہ لیا جن میں 20 ہزار 92 امیدوار کامیاب قرار پائے کامیابی کا تناسب 78.18 فیصد رہا جن میں سائنس گروپ سے ٹوٹل 18 ہزار 9 سو 29 امیدواروں نے حصہ لیا جن میں 15 ہزار 5 سو 2 کامیاب قرار پائے کامیابی کا تناسب 81.9 فیصد رہا جبکہ آرٹس گروپ میں ٹوٹل 6 ہزار 7 سو 72 امیدواروں نے حصہ لیا جن 4 ہزار 5 سو 90 کامیاب پائے اور کامیابی کا تناسب 67.78 فیصد رہا۔

جبکہ آرٹس گروپ میں گورنمنٹ گرلز ہائی سکول اماخیل ٹانک کی طالبہ عائلہ نور ولد نور تاج نے 1084نمبر لے کر پہلی پوزیشن حاصل کی۔جبکہ دوسری پوزیشن گورنمنٹ گرلز ہائر سیکنڈری سکول پہاڑپور کی طالبہ مریم دختر محمد جاوید اقبال نے 1083نمبر لے کر حاصل کی۔ اسی طرح گورنمنٹ گرلز ہائر سیکنڈری سکول پہاڑ پور ڈی آئی خان کی طالبہ رومانہ گل دختر محمد اقبال نے 1045نمبر حاصل کرکے تیسری پوزیشن حاصل کی۔

اس طرح سائنس گروپ میں دار ارقم ماڈل سکول ڈی آئی خان کے مشال خان ولد صبغت اللہ خان نے 1171نمبر لے کر پہلی پوزیشن حاصل کی۔ جبکہ قرطبہ پبلک سکول اینڈ کالج ڈی آئی خان کی عائلہ زینب دختر محمد عابد نے 1161نمبر لے کر دوسری پوزیشن حاصل کی ۔اسی طرح کیڈٹ کالج وانا کے رستم وزیر ولد ممتاز علی نے 1160نمبر لے کر تیسری پوزیشن حاصل کی۔آخر پرمہمان خصوصی سردار عمر امین خان گنڈہ پور نے پوزیشن ہولڈر طلبا و طالبات میں شیلڈز تقسیم کیں۔ڈاکٹر قیوم نواز سیکرٹری ڈیرہ بورڈ نے تمام پرنسپلز، ہیڈماسٹرز ، اساتذہ اور مہمانوں کا شکریہ ادا کیا۔