تنخواہ کی عدم ادائیگی،بھارتی ملازم نے فٹ پاتھ کو رہائش گاہ بنالیا

نوکری سے نکال دیاگیا،تنخواہ ادائیگی کی یقین دھانی کے باوجودابھی تک ادانہیں کی گئی،ملازم

منگل 5 اگست 2025 17:14

نئی دہلی (اُردو پوائنٹ اخبارتازہ ترین - این این آئی۔ 05 اگست2025ء)بھارتی کمپنی کی بے حسی کے باعث کئی ماہ سے تنخواہ نہ ملنے پر ملازم احتجاجا دفتر کے باہر رہنے اور سونے پر مجبور ہوگیا۔میڈیارپورٹس کے مطابق بھارتی کمپنی ٹاٹا کنسلٹنسی سروسز (ٹی سی ایس)کے ایک ملازم کی تصویر سوشل میڈیا پر وائرل ہوئی جس میں وہ پونے کے علاقے ہنجواڑی میں کمپنی کے دفتر کے باہر فٹ پاتھ پر سوتا ہوا دکھائی دے رہا ہے۔

مذکورہ ملازم کی شناخت سوربھ مور کے نام سے ہوئی ہے جس نے دعوی کیا ہے کہ کئی ماہ سے تنخواہ نہ ملنے کے باعث اسے سڑک پر سونا پڑا۔وائرل تصویر میں کمپنی ملازم کے ساتھ ایک ہاتھ سے لکھی گئی تحریر بھی دیکھی جا سکتی ہے جس میں لکھا ہے کہ میں نے ایچ آر کو اطلاع دے دی ہے کہ میرے پاس پیسے نہیں ہیں، اس لیے مجھے فٹ پاتھ پر کمپنی کے باہر رہنا اور سونا پڑے گا۔

(جاری ہے)

سوربھ مور کا کہنا تھا کہ وہ 29 جولائی 2025 کو ڈیوٹی پر واپس آیا تو اسے معلوم ہوا کہ اس کا ایمپلائی آئی ڈی اور کمپنی کے سسٹمز میں رسائی معطل کر دی گئی ہے۔ ان کے مطابق ایچ آر کی جانب سے تنخواہ جلد جاری کرنے کی یقین دہانی کروائی گئی، مگر اب تک کوئی ادائیگی نہیں ہوئی۔معاملے پر کمپنی نے بھارتی میڈیا سے بات کرتے ہوئے کہا کہ وہ ملازم سے رابطے میں ہیں اور مسئلے کو حل کرنے کے لیے اقدامات کیے جا رہے ہیں، کمپنی کے مطابق مذکورہ ملازم کی تنخواہ غیر حاضری کی بنیاد پر معطل کی گئی تھی، جو کمپنی کی اندرونی پالیسی کے مطابق ہے۔

ترجمان کا مزید کہنا تھا کہ فی الوقت ملازم کے لیے رہائش کا بندوبست کر دیا گیا ہے، کمپنی نے یقین دہانی کرائی کہ وہ معاملے کو منصفانہ اور تعمیری طریقے سے حل کرنے کے لیے پرعزم ہے۔