فیصل آباد،امرود کے باغبانوں کو مون سون کے دوران پھل کی مکھی سے بچانے کے لئے پودوں کی مناسب دیکھ بھال کی ہدایت

بدھ 6 اگست 2025 16:23

فیصل آباد (اُردو پوائنٹ اخبارتازہ ترین - اے پی پی۔ 06 اگست2025ء) جامعہ زرعیہ فیصل آباد کے ماہرین اثمار نے امرود کے باغبانوں کو مون سون کے دوران پھل کی مکھی سے بچانے کے لئے پودوں کی مناسب دیکھ بھال کرنے کی ہدایت کی ہے۔ انہوں نے کہا کہ باغبان امرود کے پودوں کی مناسب دیکھ بھال اور پودوں کو نقصان رساں کیڑوں و بیماریوں کے حملے سے محفوظ رکھنے کے لئے حفاظتی اقدامات کریں۔

(جاری ہے)

انہوں نے بتا یا کہ موسم برسات میں امرود کی گرمیوں کی فصل کو پھل کی مکھی سب سے زیادہ نقصان پہنچاتی ہے۔انہوں نے کہا کہ یہ مکھی پھل کے اندر اپنا ڈنگ داخل کر کے انڈے دیتی ہے جن سے چھوٹی چھوٹی سنڈیاں پیدا ہوتی ہیں جو گودے کو کھا نا شروع کر دیتی ہیں اور پھل گل سڑ جاتا ہے۔انہوں نے امرود کے باغبانوں کو ہدایت کی کہ وہ ابتدائی علامات ظاہر ہوتے ہی فوری طور پر ماہرین زراعت یا محکمہ زراعت کے فیلڈ سٹاف کی مشاورت سے تدارکی اقدامات یقینی بنائیں تاکہ انہیں کسی مالی نقصان کا سامنا نہ کرنا پڑے۔