ماہرین کا باغبانوں کو آم کے نئے پودے لگانے کا عمل فوری شروع کرنے کامشورہ

جمعہ 8 اگست 2025 14:40

فیصل آباد (اُردو پوائنٹ اخبارتازہ ترین - اے پی پی۔ 08 اگست2025ء) آری فیصل آباد کے شعبہ اثمار کے ماہرین نے باغبانوں کو آم کے نئے پودے لگانے کا عمل فوری شروع کر کے وسط ستمبر تک مکمل کرنے کامشورہ دیا ہے اور کہا ہے کہ جو باغبان و کاشتکار آم کے نئے پودے لگانا چاہتے ہوں وہ مذکورہ مدت کے دوران نئے پودے لگا لیں تاکہ ان کی بروقت بڑھوتری کا سلسلہ شروع ہو سکے۔

انہوں نے بتایا کہ رواں ماہ نئے پودے لگانے کیلئے انتہائی موزوں ہے۔ انہوں نے کہا کہ باغات میں لگانے کیلئے آم کے ایسے پودوں کا انتخاب کیا جائے جو درمیانے قد کے ہوں اور ان کی عمر 3سال سے زائد نہ ہو۔ انہوں نے کہاکہ روٹ سٹاک اور سائن کی موٹائی تقریباً برابر ہونی چاہیے، پودے چھتری نما اور ان کی3سے4شاخیں ہوں۔ انہوں نے بتایاکہ پیوندکی اونچائی زمین سے 20سے 30سینٹی میٹر ہو اورپودا نرسری میں تبدیل شدہ ہو یا اس کی جڑ نیچے سے کاٹی گئی ہو جس کا تنا بھی زخمی نہ ہو۔

(جاری ہے)

انہوں نے کہا کہ پودوں کی گاچی 25 سینٹی میٹر چوڑی اورلمبائی 30سے 35میٹر تک ہو۔ انہوں نے کہاکہ آم کے پودے کو تھرپس، سکیل، ملی بگ سمیت مختلف کیڑوں سے پاک ہوناچاہیے۔انہوں نے بتایاکہ مربع نما طریقہ سے پودے سے دوسرے پودے اورایک قطار سے دوسری قطار کا فاصلہ ہمیشہ برابر ہونا چاہیے تاکہ آم کے پودے کی بڑھوتری متاثرنہ ہو۔