یوم آزادی کی تقریبات 12 سے 14 اگست تک بھرپور جوش و جذبے کے ساتھ منائی جائیں گی،والڈ سٹی اتھارٹی

ہفتہ 9 اگست 2025 21:50

لاہور (اُردو پوائنٹ اخبارتازہ ترین - اے پی پی۔ 09 اگست2025ء) والڈ سٹی آف لاہور اتھارٹی یوم آزادی کی تقریبات 12 اگست سے 14 اگست تک بھرپور جوش و جذبے کے ساتھ منائے گی، جن میں اندرون شہر کی عمارات اور دیگر تاریخی ورثہ کی امین عمارات کو جشن آزادی کی مناسبت سے روشن کیا جائے گا۔ والڈ سٹی اتھارٹی کی تاریخ میں پہلی بار لاہور کے نمایاں ترین تاریخی ورثے کے مقامات بشمول لاہور قلعہ، مقبرہ جہانگیر، شالامار باغ، وزیر خان بارہ دری، حضوری باغ، فوڈ اسٹریٹ اور والڈ سٹی لاہور کے تمام موجودہ دروازے شاندار روشنیوں سے مزین کئے جائیں گے۔

اس منفرد اقدام کا مقصد آزادی کی روح کو جوش و جذبے سے منانا اور حالیہ معرکہ حق میں پاکستانی قوم کے اپنی آزادی کے دفاع کے کارنامے کو خراجِ تحسین پیش کرنا ہے۔

(جاری ہے)

14 اگست کی صبح 8 بجے تمام بڑے تاریخی مقامات پر بیک وقت پرچم کشائی کی تقریبات منعقد ہوں گی۔13 اگست شام 07:30 بجے وزیر خان چوک میں ایک خصوصی مشاعرہ منعقد ہوگا جس میں معروف شعرا اپنی شاعری کے ذریعے حب الوطنی اور قومی یکجہتی کو اجاگر کریں گے۔

عوام کی زیادہ سے زیادہ شرکت کے لیے یوم آزادی پر اوقاتِ کار بڑھا دیے جائیں گے لاہور قلعہ رات 12 بجے تک اور شالامار باغ رات 8 بجے تک عوام کے لیے کھلا رہے گا۔تقریبات کے حوالے سے ڈائریکٹر جنرل والڈ سٹی آف لاہور اتھارٹی ، محترمہ ملیحہ رشید نے کہا''یومِ آزادی ہمیں ان عظیم قربانیوں اور لازوال اتحاد کی یاد دلاتا ہے جن کی بدولت ہمیں آزادی نصیب ہوئی۔

اس برس، تاریخی مقامات کو پہلی بار روشنیوں سے مزین کر کے ہم اپنے شاندار ماضی کوحکومت ، عوام اور افواج کی جرات، استقامت اور عزم سے خراجِ تحسین پیش کرتے ہیں، اس امید کے ساتھ کہ مستقبل میں بھی امید، حوصلہ اور یکجہتی کا پیغام عام ہو''انہوں نے مزید کہا کہ حصول آزادی سے تحفظ آزادی کا سفر جاری و ساری ہے ۔ والڈ سٹی آف لاہور اتھارٹی ان تقریبات کے ذریعے اپنے ان آزادی کے جانبازوں، اداروں اور بہادر عوام کو خراجِ عقیدت پیش کرتا ہے جو ہر مشکل وقت میں ثابت قدم رہے ہیں۔