وزارت مذہبی امور و بین المذاہب ہم آہنگی کی ایپکس کمیٹی نے قومی مقابلہ کتبِ سیرت، نعت و مقالات 2025 کے نتائج کو حتمی شکل دیدی

منگل 12 اگست 2025 19:07

اسلام آباد (اُردو پوائنٹ اخبارتازہ ترین - اے پی پی۔ 12 اگست2025ء) وزارت مذہبی امور و بین المذاہب ہم آہنگی کی ایپکس کمیٹی نے قومی مقابلہ کتبِ سیرت، نعت و مقالات 2025 کے نتائج کو حتمی شکل دیدی۔ سیرت نویسی میں نمایاں کام کرنے والوں کو ان نتائج کے مطابق اگلے ماہ 12 ربیع الاوّل کو بین الاقوامی سیرت النبیؐ کانفرنس کے موقع پر انعامات سے نوازا جائے گا۔

وزارت مذہبی امور کے مطابق پروفیسر ڈاکٹر صاحبزادہ ساجد الرحمن کی زیر صدارت ماہرین تعلیم اور اسلامی سکالرز پر مشتمل ایپکس کمیٹی کا اجلاس گذشتہ روز وزارتِ مذہبی امور میں منعقد ہوا۔ دیگر اراکین میں ڈاکٹر ریاض مجید، ڈاکٹر یوسف فاروقی، ڈاکٹر محمد سجاد، ڈاکٹر اکرام الحق یٰسین ، ڈاکٹر محی الدین ہاشمی، ڈاکٹر محمد الیاس،ڈاکٹر فیروز الدین شاہ، ڈاکٹر منزہ بتول شامل تھے۔

(جاری ہے)

سالانہ قومی مقابلہ کتبِ سیرت ، نعت و مقالات 2025کے تحت موصول ہونے والی کتب اور مقالات کے ابتدائی نتائج ایپکس کمیٹی کے سامنے رکھے گئے۔ مقابلے میں شامل تمام کتب، مجلات اور مقالات کو ججز کمیٹی کی طرف سے دیئے گئے نمبروں اور سفارشات کی جانچ پرکھ کے بعد ایپکس کمیٹی نے نتائج کو حتمی شکل دی۔ واضح رہے کہ نمایاں کیٹگریز میں قومی زبان اُردو، علاقائی اور دیگر غیر ملکی زبانوں میں لکھی گئی کتب سیرت ، نعت اور مجلات کیلئے 142 کتب موصول ہوئیں ۔

نیز مقالہ نگاری کے لئے مختص موضوع ’’سوشل میڈیاکے مفید استعمال کی تعلیم وتربیت میں ریاستی ذمہ داریاں۔۔ سیرت النبیؐ کی روشنی میں‘‘ پر مرد و خواتین مقالہ نگاروں کی جانب سے107 مقالے موصول ہوئے۔ دور حاضر کے مسائل کے لئے سیرت طیبہ سے رہنمائی پر مبنی ایسے بہترین اور انعام یافتہ مقالہ جات کی طباعت کروا کر مختلف درسگاہوں اور مشہور لائبریریوں میں پہنچانا وزارتِ مذہبی امور کا احسن قدم ہے جو گذشتہ کئی دہائیوں سے کامیابی سے جاری ہے۔