فیصل آباد،کاشتکاروں کو کما د کی فصل کو سہہ اور چوہوں سے بچانے کے لئے ایلومینیم فاسفائیڈ کی گولیاں رکھ کر بل بند کرنے کی ہدایت

جمعہ 22 اگست 2025 12:42

فیصل آباد (اُردو پوائنٹ اخبارتازہ ترین - اے پی پی۔ 22 اگست2025ء) محکمہ زراعت نے کاشتکاروں کو کما د کی فصل کو سہہ اور چوہوں سے بچانے کے لئے فوری طورپر ان کے بلوں میں ایلومینیم فاسفائیڈ کی گولیاں رکھ کر بل بند کرنے کی ہدایت کی ہے۔ نظامت زرعی اطلاعات محکمہ زراعت فیصل آباد کے ماہرین نے کہا کہ فصل کو نشوونما کے اس مرحلہ پر چوہوں، سہہ اور جنگلی سور کے نقصان سے بچانے کی ضرورت ہوتی ہے۔

انہوں نے بتایا کہ چوہے فصل کی جڑوں اور تنے پر حملہ آور ہوتے ہیں اور یہ فصل کو کُتر کر شدید نقصان پہنچاتے ہیں جس سے حملہ شدہ گنے خشک ہو جاتے ہیں تاہم کھیتوں کے اردگرد سے جڑی بوٹیاں اور سرکنڈے وغیرہ تلف کرنے سے چوہوں کی تعداد کم کی جا سکتی ہے کیونکہ یہ ان میں چھپے رہتے ہیں۔ انہوں نے کہاکہ کاشتکار جنگلی بلیوں، گیدڑوں اور الوؤں کا شکار نہ کریں کیونکہ چوہے ان کی اہم خوراک ہیں اسی طرح پنجرے یا کڑکی میں گھی والی روٹی، امرود یا سیب وغیرہ لگا کر چوہوں کا شکار کر کے تلف کریں۔

(جاری ہے)

انہوں نے کہاکہ کاشتکار زنک فاسفائیڈ کی گڑ اور آٹے کے ساتھ گولیاں بنا کر چوہوں کے بلوں کے قریب رکھیں تاکہ چوہے گولیاں کھا کر مر جائیں نیز ایلومینیم فاسفائیڈ (فاسفین یا ڈیٹیا گیس) کی ایک گولی بل کے اندر رکھ کر بند کرنے سے بھی چوہے تلف ہو جائیں گے۔انہوں نے بتایاکہ سہہ بھی کماد کی جڑوں اور تنے پر حملہ آور ہوتی ہے اور اپنے بلوں سے کافی دور تک جا کر نقصان کرتی ہے۔انہوں نے کہاکہ چونکہ سہہ مٹی کے ڈھیروں اور اجاڑ جگہوں پر بل بنا کر رہتی ہے لہٰذامٹی کے ڈھیروں اور اجاڑ جگہوں کو اردگرد کے کھیتوں سے ختم کر دیاجائے۔