‏پاک فوج کا جھنگ، فیصل آباد، چنیوٹ اور ٹوبہ ٹیک سنگھ میں ریسکیو آپریشن جاری

ہفتہ 30 اگست 2025 13:45

اسلام آباد (اُردو پوائنٹ اخبارتازہ ترین - اے پی پی۔ 30 اگست2025ء) ‏پاک فوج کا جھنگ، فیصل آباد، چنیوٹ اور ٹوبہ ٹیک سنگھ میں ریسکیو آپریشن جاری ہے، ‏پنجاب کے سیلابی علاقوں میں پاک فوج کے دستے ریسکیو اینڈ ریلیف آپریشن میں مصروف عمل ہیں۔پاک فوج کی جانب سے آبادی کو بچانے کیلئے جھنگ اور فیصل آباد میں تین مقامات پر بند میں شگاف ڈالے گئے ہیں،بند میں شگاف ڈالنے کے بعد ایک تا ڈیڑھ لاکھ کیوسک پانی نیچے کی سمت منتقل ہو گیا ہے۔

پاک فوج کے جوان متاثرین سیلاب کو ہیلی کاپٹر اور کشتیوں کے ذریعے محفوظ مقامات پر منتقل کر رہے ہیں۔فیصل آباد کے متاثرہ دیہات میں پھنسے 15ہزار800افراد میں سے 14ہزار50 افراد کو ریسکیو کر لیا گیا ہے،ریسکیو کیے جانے والے افراد میں بزرگ شہری، بچے اور خواتین بھی شامل ہیں۔

(جاری ہے)

اسی طرح تحصیل تاندلیانوالہ میں سیلاب متاثرین کے لیے 5 ریلیف کیمپس، 18 میڈیکل کیمپس اور 6 ریسکیو کیمپس فعال ہیں جبکہ ٹوبہ ٹیک سنگھ میں بھی پاک فوج کے ریسکیو 1122 کےساتھ مل کر ریسکیو اینڈ ریلیف کیمپس قائم کردیئے گئے ہیں۔

ریلیف کیمپس میں پاک فوج کی جانب سے سیلاب متاثرین کو ضروری طبی امداد اور مفت ادویات فراہم کی جا رہی ہیں۔پاک فوج کی سیلابی پانی کی فوری نکاسی اور متاثرہ دیہات میں ریلیف سرگرمیاں مزید تیز کر دی گئی ہیں ۔‏متاثرین سیلاب کی جانب سے پاک فوج کے ریسکیو اینڈ ریلیف آپریشن کو سراہا جا رہا ہے۔‏مشکل کی اس گھڑی میں پاک فوج عوام کے شانہ بشانہ کھڑی ہے۔