دھان کے مڈھوں کو تلف کرنے کے لئے روٹا ویٹر اور مشین سے کٹائی کرکے باقیات زمین میں ملاکرذرخیزی میں اضافہ کیا جاسکتا ہے،ڈائریکٹر محکمہ زراعت توسیع فیصل آباد

جمعرات 4 ستمبر 2025 13:16

فیصل آباد (اُردو پوائنٹ اخبارتازہ ترین - اے پی پی۔ 04 ستمبر2025ء) ڈائریکٹر محکمہ زراعت توسیع فیصل آبادخالدمحمود نے کہا ہے کہ دھان کے مڈھوں کو تلف کرنے کے لئے روٹا ویٹر اور مشین سے کٹائی کی صورت میں ڈسک ہیرو کی مدد سے فصل کی باقیات کو زمین میں ملاکراس کی زرخیزی اور پیداواری صلاحیت میں اضافہ کیا جاسکتا ہے۔ انہوں نے کہا کہ دھان کے مڈھوں کو آگ لگانے سے فضائی آلودگی پیدا ہوتی ہے اور اس کی وجہ سے انسانی زندگی، فصلوں ، باغات اور سبزیوں پر منفی اثرات مرتب ہونے کا اندیشہ ہوتا ہے اس لئے دھان کے کاشتکار کٹائی کے بعد مڈھوں کو آگ لگانے سے گریز کریں۔

انہوں نے کہا کہ دھان کے مڈھوں کو آگ لگانے سے نہ صرف زمین کی بالائی سطح پر موجود نامیاتی مادے کو نقصان پہنچتا ہے اور زمین کی زرخیزی متاثر ہوتی ہے بلکہ اس سے اٹھنے والا دھواں ٹریفک حادثات اور انسانی جانوں کے ضیاع کا باعث بھی بنتا ہے لہٰذا دھان کے کاشتکار مڈھوں کو آگ لگانے کی بجائے زمین میں ملا کر زرخیزی میں اضافہ کریں۔

(جاری ہے)

انہوں نے بتایا کہ امسال محکمہ زراعت کی ٹیمیں دھان کے مڈھوں کو آ گ نہ لگانے کے لئے بھرپور مانیٹرنگ کر رہی ہیں اس لئے دھان کے اس سلسلہ میں محکمہ سے مکمل تعاون کریں کیونکہ سموگ کی وجہ سے انسانی زندگیوں پر براہ راست منفی اثرات مرتب ہوتے ہیں لہٰذا عوامی مفاد کے پیش نظر کاشتکاردھان کے مڈھوں کو آگ لگانے سے گریز کریں تاکہ ماحول فضائی آلودگی سےمحفوظ رہے۔