شہریوں کو کچن گارڈننگ کے تحت موسم سرما کی سبزیاں کاشت کرنے کی ہدایت

فیصل آباد (اُردو پوائنٹ اخبارتازہ ترین - اے پی پی۔ 08 ستمبر2025ء) ریسرچ انفارمیشن یونٹ ایوب زرعی تحقیقاتی ادارہ فیصل آبادنے شہریوں کو کچن گارڈننگ کے تحت موسم سرما کی سبزیاں کاشت کرنے کی ہدایت کی ہے ۔ آری کے ترجمان نے کہا کہ موسم سرما کی سبزیاں ستمبر، اکتوبرمیں کاشت اور فروری ، مارچ تک برداشت ہوتی رہتی ہیں جبکہ موسم سرما کی سبزیوں میں پھول گوبھی، بند گوبھی، آلو، پیاز، سلاد، مولی، شلجم، مٹر، گاجر، پالک، میتھی، دھنیاں ، لہسن اورموسم گرما میں بھنڈی، کریلا، کھیرا، تربوز اور خربوز کو زمین میں براہ راست کاشت کیا جاتا ہے نیزپھول گوبھی، بند گوبھی، بروکلی، پیاز اور سلاد موسم سرما میں بذریعہ پنیری کاشت ہونے والی سبزیاں ہیں تاہم سبزیوں کےلئے ایسی جگہ منتخب کریں جہاں پودے دن میں چھ گھنٹے سورج کی روشنی سے مستفید ہوسکیں۔

(جاری ہے)

ترجمان نے کہا کہ کچن گارڈننگ کے تحت اپنے کھیت یا گھر کے باغیچہ میں کاشت کی گئی سبزیاں تازہ، صحت مند، سستی، زرعی زہروں اور دیگر آلائشوں سے پاک ہوتی ہیں جن کے استعمال سے انسانی صحت پر خوشگوار اثرات مرتب ہوتے ہیں۔انہوں نے کہا کہ عام طور پر کچن گارڈننگ کا مطلب گھریلو پیمانے پر سبزیوں کی کاشت ہے تاہم خصوصی طور پر اس سے مراد ایسی سبزیوں کی کاشت ہے جو کسی بھی گھر کی روزمرہ کی ضرورت بھی ہو اور جنہیں کچن کے قریب لان، گملوں، ٹوکریوں، پلاسٹک بیگ، لکڑی و پلاسٹک کے ڈبوں یا چھت پر اگا کر ہر وقت تازہ سبزی کے حصول کو ممکن بنا کر گھریلو ضرورت کو پورا کیا جا سکے کیونکہ اس طرح کاشت کی گئی سبزیاں آلودگی اور کیمیائی کھادوں و زہریلی ادویات کے استعمال سے پاک ہوتی ہیں۔

انہوں نے بتایا کہ اگر آپ کے صحن یا باغیچے میں کوئی ایسی جگہ ہے جہاں زیادہ دیر تک سایہ رہتا ہو تو ایسی جگہ پر پتوں والی سبزیاں مثلاً دھنیاں ، پودینہ، پالک، سلاد وغیرہ کاشت کریں لیکن کاشت کے لیے منتخب رقبہ کو ناپ لیں تا کہ آپ کو اندازہ ہو سکے کہ رقبہ کے لیے کتنی کھاد اور بیج کی ضرورت ہو گی۔انہوں نے بتایا کہ ایک مرلہ زمین272مربع فٹ کے برابر ہوتی ہے یعنی ایک مرلہ زمین کی لمبائی اور چوڑائی کا حاصل ضرب 272فٹ ہو گا۔انہوں نے کہا کہ زمین ناپنے کے بعد اپنی ضرورت، پسند اور موسم کو مد نظر رکھتے ہوئے مختلف سبزیوں کیلئے رقبہ مختص کر لیں کیونکہ بعض سبزیاں مثلاً دھنیاں، پودینہ کم رقبے سے بھی گھر کی ضرورت پوری کر دیتی ہیں جبکہ دیگر سبزیوں کو زیادہ رقبے کی ضرورت ہوتی ہے۔