کاشتکارہر ضلعے میں قائم لیبارٹریز کے ذریعے معمولی نرخوں پر مٹی وپانی کا تجزیہ کروا سکتے ہیں، محکمہ زراعت

بدھ 10 ستمبر 2025 14:08

فیصل آباد (اُردو پوائنٹ اخبارتازہ ترین - اے پی پی۔ 10 ستمبر2025ء) محکمہ زراعت نے کہا ہے کہ فیصل آبادڈویژن سمیت صوبے کے ہر ضلعے میں مٹی اورپانی کے تجزیے کےلئے لیبارٹریاں قائم کررکھی ہیں جہاں کاشتکار انتہائی معمولی نرخوں پر مٹی کا تجزیہ کروا سکتے ہیں۔ یہ بات نظامت زرعی اطلاعات کے ترجمان نے ایک بیان میں کہی۔

(جاری ہے)

انہوں نے کہا کہ کاشتکاروں کو چاہیے کہ وہ مٹی وپانی کے تجزیے کی رپورٹ کی روشنی میں کھادوں کامتناسب استعمال یقینی بنائیں تاکہ پیداواری لاگت میں کمی کے علاوہ فصلوں کی فی ایکڑ زیادہ پیداوار حاصل کی جاسکے۔

انہوں نے بتایاکہ کاشتکار کوئی بھی فصل کاشت کرنے سے قبل اپنے کھیتوں کی مٹی اور ٹیوب ویل کے پانی کا تجزیہ کرواسکتے ہیں کیونکہ اس سے فصلوں کی کاشت، کھادوں کے استعمال اور آبپاشی کے بارے میں انہیں سفارشات سے آگاہ کیا جاسکتاہے۔ انہوں نے کہاکہ زرعی اجناس کی فصلوں کی بھرپور پیداوار کےلئے صحت مند زمین اور آبپاشی کےلئے موزوں پانی ریڑھ کی ہڈی کی حیثیت رکھتاہے جس میں کوتاہی کاشتکار کےلئے بعد ازاں پیداوار میں کمی اور مالی نقصان کاباعث بن سکتی ہے۔