لاہور ہائیکورٹ کی ثقافتی گیلری کو پراپرٹی ٹیکس کے نوٹس پر سیکرٹری ایکسائز کو درخواست گزار کو سن کر فیصلہ کرنیکی ہدایت

منگل 16 ستمبر 2025 20:10

لاہور (اُردو پوائنٹ اخبارتازہ ترین - اے پی پی۔ 16 ستمبر2025ء) لاہور ہائیکورٹ کے دو رکنی بینچ نے اندرونِ شہر واقع ثقافتی گیلری کو پراپرٹی ٹیکس کے نوٹس کیخلاف درخواست سیکرٹری ایکسائز کو بھجواتے ہوئے 45 دنوں کے اندر درخواست گزار کو سن کر فیصلہ کرنیکی ہدایت کردی۔

(جاری ہے)

لاہور ہائیکورٹ کے جسٹس حسن نواز مخدوم اور جسٹس خالد اسحاق پر مشتمل دو رکنی بینچ نے این سی اے لاہور کے سابق پروفیسر ڈاکٹر اعجاز انور کی درخواست پر ابتدائی سماعت کی ۔

عدالت کے روبرو درخواستگزار ڈاکٹر اعجاز انور نے موقف اختیار کیا کہ ثقافتی گیلری ایک عوامی اور ثقافتی اثاثہ ہے، جسے پراپرٹی ٹیکس سے استثنیٰ دیا جانا چاہیے، گیلری کو پراپرٹی ٹیکس کے دائرے میں لانا قانون اور انصاف کے تقاضوں کے منافی ہے،عدالت نے ریمارکس دیئے کہ متعلقہ حکام اس معاملے پر قانون کے مطابق فیصلہ کریں۔