توشہ خانہ ٹو کیس،عمران خان ، بشریٰ بی بی کے وکیل کی کارروائی کا بائیکاٹ کرنے کی دھمکی

جمعہ 19 ستمبر 2025 13:42

اسلام آباد(اُردو پوائنٹ اخبارتازہ ترین - این این آئی۔ 19 ستمبر2025ء)اسلام آباد ہائیکورٹ میں توشہ خانہ ٹوکیس سے متعلق اہم پیشرفت سامنے آئی ہے،بانی پی ٹی آئی اور بشریٰ بی بی کے وکیل نے بریت درخواستیں پیر 22ستمبرکومقررنہ ہونے کی صورت میں کارروائی کا بائیکاٹ کرنے کی دھمکی دے دی۔جمعہ کو اسلام آبادہائیکورٹ میں بانی پی ٹی آئی اوربشریٰ بی بی کی توشہ خانہ ٹوکیس میں بریت کی درخواستیں جلد مقررکرنے کے لئے متفرق درخواستوں پر سماعت ہوئی۔

(جاری ہے)

دوران سماعت وکیل سلمان صفدرنے مؤقف اختیار کیاکہ ہماری درخواستیں پیرکومقررکریں،ورنہ اس کیس میں دوبارہ عدالت نہیں آؤں گا۔وکیل نے کہاکہ ہمیں عدالتوں کے دھکے کھانے پڑ رہے ہیں لیکن کیسز نہیں لگتے،کیس کا ٹرائل بہت جلدبازی میں چلایا جا رہا ہے، اگر پیرتک درخواست نہ لگی تو فیصلہ آ جائے گا۔جسٹس انعام امین منہاس نے کہاکہ پیر کو میرے پاس کئی کیسز ہیں لیکن دیکھ لیتا ہوں، روسٹر دیکھ کر بتایا جائے گا کہ بریت کا کیس کب لگے گا۔