روس کے جنگی طیارے اسٹونیا کی حدود میں داخل

استونیا سمیت کسی بھی ملک کی فضائی حدود کی خلاف ورزی نہیں کی،روسی وزارت دفاع

ہفتہ 20 ستمبر 2025 14:35

ماسکو(اُردو پوائنٹ اخبارتازہ ترین - این این آئی۔ 20 ستمبر2025ء)روس نے استونیا کا فضائی حدود کی خلاف ورزی کا الزام مسترد کر دیا۔روسی وزارت دفاع کے مطابق 3 مگ تھرٹی ون طیاروں نے کاریلیا سے کیلین انگراڈ علاقے میں واقع ایئر فیلڈ تک شیڈولڈ پروازیں کی تھیں اور اس دوران طیارے بین الاقوامی فضائی قوانین کی پاسداری کرتے ہوئے پرواز کرتے رہے۔

(جاری ہے)

وزارت دفاع کی جانب سے کہا گیا ہے کہ طیاروں نے استونیا سمیت کسی بھی ملک کی فضائی حدود کی خلاف ورزی نہیں کی، دعوی کیا گیا کہ مانیٹرنگ سے بھی اس بات کی تصدیق کی گئی ہے۔

روسی وزارت دفاع کے مطابق پروازیں ویندلو جزیرے سے 3 کلومیٹر کے فاصلے پر بحیرہ بالٹک کے غیرجانبدار حصہ کے اوپر کی گئیں۔اس سے قبل استونیا کی وزارت خارجہ نے روس کے ناظم الامور کو طلب کر کے احتجاجی مراسلہ تھمایا تھا اور الزام لگایا تھا کہ روسی طیاروں نے استونیا کی فضائی حدود کی 12 منٹ تک خلاف ورزی کی۔استونیا نے نیٹو سے مشاورت کا بھی فیصلہ کیا تھا تاکہ اپنی سلامتی کے خدشات کی بنیاد پر آرٹیکل فور کے تحت روس کے خلاف کارروائی پر غور کیا جائے۔